Ijtimoiy tarmoqlarda Toshkent shahrining Chilonzor tumanida aktrisa Luiza Rasulova hamda uning oila aʼzolariga nisbatan tahdid qilingani aks etgan videolavha tarqaldi. Holat yuzasidan shahar IIBB maʼlumot berdi.

Qayd etilishicha, 9-mart kuni soat 15.00 larda Chilonzor-6 dahasidagi ko‘p qavatli uylardan birining uyboshisi — 1959-yilda tug‘ilgan A.R. (Luiza Rasulovaning onasi) va shu ko‘p qavatli uyning ikkinchi qavatida joylashgan o‘quv muassasasi rahbari — 1971-yilda tug‘ilgan B.Ch. bilan o‘zaro nizo kelib chiqqan. Nizoning sababi A.R. ko‘p qavatli uyning umumiy kirish eshigiga kodli qulf qo‘yib, ikkinchi qavatda joylashgan o‘quv muassasasiga kelgan o‘quvchilarni kirishiga to‘sqinlik qilgan. Shu orada B.Ch. fuqaro A.R. ni qo‘lidan tortgan vaqtida A.R. va uning qizi Luiza Rasulova yerga yiqilgan.

L.Rasulova va uning onasiga tibbiy yordam ko‘rsatilishi uchun shifoxonaga yotqizilgan. Birlamchi maʼlumotga ko‘ra, A.R.da “ensa sohasi yumshoq to‘qimalarini lat yoyishi”, L.Rasulovada “o‘ng bilak va o‘ng tizza sohasi yumshoq to‘qimalari lat yeyishi” jarohatlari borligi aniqlangan.

Fuqaro B.Ch. profilaktika inspektori tomonidan ushlanib, yaqin oradagi IIBga olib borilgan.

Mazkur holat yuzasidan Chilonzor tumani IIO FMB tomonidan tergovga qadar tekshiruv o‘tkazilmoqda. Tekshiruv yakuni bo‘yicha qonuniy qaror qabul qilinishi taʼminlanadi.

• Jinoyat
• rasmiy munosabat