Kecha, 12-noyabr kuni bo‘lib o‘tgan Turkiy tilli davlatlar hamkorlik kengashi sammitida Alisher Navoiy nomidagi xalqaro mukofotni ta’sis etish to‘g‘risidagi qaror qabul qilindi.

Mazkur taklif ushbu tashkilotning joriy yil 31-martdagi norasmiy sammitida bildirilgan va bu  tashabbus sammit ishtirokchilari tomonidan qo‘llab-quvvatlangan edi.

Turkiy kengashning 8-sammitida nutq so‘zlagan O‘zbekiston Prezidenti Shavkat Mirziyoyev sammitning yuqoridagi qarorni qabul qilishidan minnatdor ekanini ta’kidladi va bu borada o‘z takliflarini berdi.

–  Bugungi sammitimizda Turkiy dunyo birligiga salmoqli hissa qo‘shgan ulug‘ mutafakkir va davlat arbobi Mir Alisher Navoiy nomidagi xalqaro mukofotni ta’sis etish haqidagi qaror qabul qilinishi munosabati bilan barchangizga yana bir bor minnatdorchilik bildiraman.
Turkiy dunyoning buyuk vakillari umumbashariy madaniyat va sivilizasiya taraqqiyotiga qanday ulkan hissa qo‘shgani hammamizga ma’lum.
Mana, yaqinda Istanbul shahrida qayta ta’mirlangan muhtasham Otaturk madaniyat markazida Turkiy dunyoning ulug‘ allomalari siymolari yod etilgani ayniqsa e’tiborlidir.Tashkilotimizga a’zo barcha mamlakatlar fondlarida ana shu bebaho meros asrab-avaylab saqlanmoqda. Jumladan, O‘zbekistonda ham mushtarak tariximiz va madaniyatimizga oid 200 mingga yaqin noyob qo‘lyozmalar mavjud.
Ana shu nodir asarlarni birgalikda o‘rganish, ularni tarjima qilish, yagona elektron bazasini yaratish, bu sohaga raqamli texnologiyalarni joriy etish maqsadida “Turkiy tilli davlatlarning tarixiy, ilmiy va madaniy merosini o‘rganish tadqiqot markazi”ni tashkil etishni taklif qilamiz.
O‘ylaymanki, ushbu markaz qardosh xalqlarimizning bebaho merosini kelgusi avlodlar va dunyo ahliga yetkazishga muhim hissa qo‘shadi, – dedi Mirziyoyev.

Eslatib o‘tamiz, Turkiy kengash doirasida beriladigan ushbu xalqaro mukofot fan, ta’lim, adabiyot, san’at, ijtimoiy sohalardagi yutuqlar hamda turkiy dunyo birligini mustahkamlash yo‘lidagi sa’y-harakatlarni rag‘batlantirish maqsadida tashkil etildi.

• Mukofot
• Navoiy