“Milliy tiklanish” DP lideri Alisher Qodirov yana bir vazirlik tashkil etish tashabbusi bilan chiqdi.

Qodirovga ko‘ra, ushbu masala partiya fraksiyasi majlisida hamda joriy yilning 11-yanvar kuni bo‘lib o‘tgan partiya faollarining kengaytirilgan muhokamasida ko‘rib chiqilgan.

Partiya rahbari jamiyat taraqqiyotini ta’lim va tarbiya islohotida ko‘rarkan, pedagogika sohasini isloh qilishga ustuvorlik berilishi lozimligini ta’kidlaydi.

Qodirov bu borada o‘z takliflarini bildirib 6ta banddan iborat masalani o‘rtaga tashlaydi. Jumladan, ota-onalarni farzand tarbiya qilishda ularni ijtimoiy-iqtisodiy qo‘llab-quvvatlash, bolalar bog‘chalarida tarbiya metodikasi belgilash, maktablarda o‘quvchi bilimi va pedagog faoliyati yangi tizimi - video kuzatuv asosida baholanishi, Tarbiya va ta’lim sifatini nazorat qilish Inspeksiyasi Parlament huzurida va Parlamentga bevosita hisobdor bo‘lishi hamda Pedagogika institutlariga tanlov maxsus tizim asosida, faqat pedagogik qobiliyati bo‘lganlarnigina saralab olishga qaratilishi lozimligini ta’kidlaydi.

Shuningdek, u Tarbiya va ta’lim vazirligi tashkil etish taklifini bildirib, vazirning uchta – oila va xotin-qizlar masalalariga, bog‘chada tarbiya va boshlang‘ich ta’limni tashkil etishga hamda maktabda ta’lim va tarbiyani tashkil qilishga mas’ul bo‘lgan o‘rinbosarlari bo‘lishi kerakligini aytadi.

“Bu vazirlik har bir bolani oiladan boshlab maktabdan chiqib ketgunicha (tug‘ilganidan 18 yoshgacha) bo‘lgan davrda tarbiyasi va ta’lim sifati uchun mas’ul bo‘ladi. Vazirlikka ota-onalar bilan yaqindan ishlash, ularni malakasini oshirish bilan birga, mas’uliyatsizlik uchun javobgarlikka tortishni tashabbus qilish vakolatlari ham berilishi kerak”, – deb yozadi Qodirov.

• Alisher Qodirov
• Milliy tiklanish
• Vazirlik
• qiziqarli