Bir necha kun avval “Sevimli” telekanalida efirga uzatilgan “Niqob” ko‘rsatuvining o‘zbekcha varianti birinchi fasli yakunlandi. Shundan so‘ng, ko‘rsatuv boshlovchisi Alisher Uzoqov o‘zining ijtimoiy tarmoqlardagi sahifasi orqali boshqa davlatga ketishi haqidagi mish-mishlarga oydinlik kiritdi va O‘zbekistonni tark etayotganini tasdiqladi. Biroq aktyor qaysi mamlakatga ketishi haqida ma’lum qilmagan.

Uning so‘zlariga ko‘ra, Uzoqov orzusini amalga oshirish uchun ketmoqda. U o‘z oldiga qo‘ygan maqsadlarga erishish yo‘lida ilk qadamlarni tashlaganini ta’kidlab, ustidan kulgan va muvaffaqiyatga erisha olmasligiga ishonayotganlarga yuzlandi.

“Ko‘pchilik mening rejalarim ustidan kulib, kelajagimga ishonmadi va bu meni yanada ko‘proq ishlashga va maqsadlarimga erishishga undayapti. Hammasini vaqt ko‘rsatadi. Eng muhimi, qo‘l qovushtirib o‘tirmayapman. Men harakat qilyapman”, – dedi Alisher Uzoqov.

Qayd etish mumkin, 39 yoshli Alisher Uzoqov aktyor, qo‘shiqchi, prodyuser, rejissyor, sharhlovchi va sobiq futbolchi sanaladi. U 2009-yilda “Janob hech kim” filmidagi roli sabab shuhrat qozongan. Alisher Uzoqov rejissyorlikda ham o‘zini sinab ko‘rgan va 2012-yilda “Endi dadam bo‘ydoq?”, shuningdek 2018-yilda “Muzlagan” komedik filmlarini suratga olgan. 

Uzoqov 2012 – 2015 yillarda O‘zbekiston chempionatining Birinchi ligasida ishtirok etuvchi Toshkentning “Istiqlol” futbol klubida to‘p tepgan.

• Kino
• aktyor