DXX tomonidan fuqarolarga “Oʻzbekiston – Turkiya – Yevropa – Meksika – AQSh” yoʻnalishida Qoʻshma Shtatlarga ishlash uchun yuborishni vaʼda qilganlar qoʻlga olindi.

Xususan, Davlat xavfsizlik xizmatining Samarqand viloyati boʻyicha boshqarmasi hamda viloyat ichki ishlar boshqarmasi xodimlari hamkorligida oʻtkazilgan tezkor tadbirda, Samarqand shahrida yashovchi, 1980 y.t. shaxs oʻzganing ishonchiga kirib, 30 ming AQSh dollari evaziga tanishlari orqali uni Amerika Qoʻshma Shtatlariga yuborishini aytib, oldindan 10 ming AQSh dollari olgan vaqtida ushlangan.

Boshqa bir holatda esa Samarqand viloyatining Ishtixon tumanida yashovchi, 1996 y.t. shaxs Jizzax viloyatining Doʻstlik tumanida istiqomat qiluvchi, 1981 y.t. fuqaroning ishonchiga qirib, tanishlari yordamida uni Qoʻshma Shtatlarga yuborish evaziga 21 ming AQSh dollari talab qiladi.

DXX Jizzax viloyati boʻyicha boshqarmasi xodimlari tomonidan Iqtisodiy jinoyatlarga qarshi kurashish departamentining hududiy boshqarmasi bilan hamkorlikda Gʻallaorol tumanida oʻtkazilgan tezkor tadbirda, u 10 ming AQSh dollari va 100 mln. soʻm olgan vaqtida ushlandi.

Shuningdek, Toshkent shahrida qayd etilgan holatda, nufuzli universitetlardan birining talabasi yuqori tashkilotda ishlovchi tanishlari orqali Jizzax viloyatining Mirzachoʻl tumanida yashovchi fuqaroni Amerikaga yuborish evaziga 20 ming AQSh dollari talab qilib, oldindan 3 ming AQSh dollari olgan vaqtida Davlat xavfsizlik xizmati va Bosh prokuratura huzuridagi Departament xodimlari tomonidan ushlandi.

Taʼkidlanishicha, har uchala holatda fuqarolarga “Oʻzbekiston – Turkiya – Yevropa – Meksika – AQSh” yoʻnalishida Qoʻshma Shtatlarga ishlash uchun yuborish vaʼda qilingan.

Maʼlum qilinishicha, hozirda mazkur shaxslarga nisbatan Jinoyat Kodeksining tegishli moddalari bilan jinoyat ishlari qoʻzgʻatilib, tergov harakatlari olib borilmoqda.

• AQSh
• DXX
• Firibgarlik