U bir muddat mazkur jinoyatda aybli deb topilib, qamoqqa olingan, ammo sud uni 2021-yil 5-maydagi hukmi bilan oqlagan edi. 
Bosh prokuratura sud hukmiga nisbatan apellyatsiya tartibida protest kiritgan.

Bosh prokuratura ijtimoiy tarmoqlarda Andijon viloyatining Asaka tumanida 9 yoshli qizaloqning vahshiylarcha o‘ldirilgani holati yuzasidan tarqalayotgan turli ma’lumotlar yuzasidan ma’lumot berdi.

Gap shundaki, joriy yil 21-iyun kuni Asaka tumanida 9 yoshli qizning murdasi o‘z uyida qotillik alomatlari bilan topilgan.
Mazkur holat yuzasidan jinoyat ishi qo‘zg‘atilib, tergov harakatlari Bosh prokuraturaning O‘ta og‘ir jinoyatlarni tergov qilish boshqarmasi tomonidan olib borilgan.

To‘plangan dalillarga asosan dastlabki tergovda fuqaro Asroraxon Hamdamova 2020-yil 21-iyun kuni qo‘shnisi D.A. istiqomat qiladigan uyga o‘g‘rilik maqsadida kirgani va u yerdan pul olganiga guvoh bo‘lgan, yosh bola Q.I.ning tanasiga bir necha marotaba pichoq bilan jarohat yetkazib, uni qasddan o‘ldirgani aniqlangan.

Shuningdek, A.Hamdamova o‘g‘irlik hamda firibgarlik jinoyatlarini ham sodir etganligi o‘z isbotini topgan.

2020-yil 21-iyun kuni mazkur jinoyat ishi ayblov xulosasi bilan mazmunan ko‘rish uchun Andijon viloyat sudiga yuborilgan.
Biroq, tergov davomida aniqlangan va isbotlangan dalil hamda vajlar sud tomonidan inobatga olinmagan, o‘ta og‘ir jinoyat harakatlariga yetarli baho berilmagan.

Shu tariqa Andijon viloyat sudi jinoyat ishlari bo‘yicha sudlov hay’atining 2021-yil 5-maydagi hukmi bilan A.Hamdamova faqatgina firibgarlikda, ya’ni, marhuma qizning onasiga tegishli bo‘lgan tilla zanjirni aldov yo‘li bilan qo‘lga kiritishda aybdor deb topilib, unga nisbatan 2 yil muddatga ozodlikdan cheklash jazosi tayinlangan.  
O‘g‘irlik, bosqinchilik va mudhish jinoyat – qotillik yuzasidan esa, u oqlangan.

Bu orada A.Hamdamova OAVlarda chiqish qilib tergov jarayonlarida qo‘rqitilgani yoki qiynoqqa solingani haqida gapiradi.
Bosh prokuratura yuqoridagi holat yuzasidan munosabat bildirib, A.Hamdamovaning iddaolarini rad qiladi.

Shuningdek, Bosh prokuraturaga ko‘ra, ayblanuvchining aybi uning ko‘rsatuvi bo‘yicha olingan ashyoviy dalil (pichoq), pichoq dastasi ichidan olingan namuna marhuma qizga tegishli ekanligi tasdiqlangan ekspertiza xulosasi, guvohlarning ko‘rsatuvlari, xususan to‘rt nafar guvoh A.Hamdamova marhuma qizning xonadonidan yugurib chiqqanini ko‘rishgani va boshqa dalillar bilan to‘liq isbotlangan.

Bundan tashqari, A.Hamdamova o‘z aybiga iqrorligini ham bayon qilgan. Jumladan, qo‘shnisining uyiga o‘g‘irlik maqsadida kirgani va shu qo‘shnining yosh qizi (marhuma) uni ko‘rib qolganidan qo‘rqib, norasidani pichoq bilan o‘ldirganligini tan olgan.

Eng muhimi, A.Hamdamovaning iqrorlik ko‘rsatuvlari real voqelikka asoslangani va ixtiyoriy ravishda berilgani sud-psixologiya ekspertizasi xulosasi bilan tasdiqlangan.

“Shu bois, joriy yil 12-may kuni Andijon viloyat prokuraturasi tomonidan Andijon viloyat sudi jinoyat ishlari bo‘yicha sudlov hay’atining 2021 yil 5 maydagi hukmiga nisbatan Oliy sudning jinoyat ishlari bo‘yicha apellyatsiya instansiyasiga apellyatsiya tartibida protest keltirildi”, – deyiladi rasmiy ma’lumotda.

Rasmiy ma’lumotda aytilishicha, Asroraxon Xamdamova Jinoyat kodeksining 97-moddasi ikkinchi qismi va boshqa moddalar bilan aybli deb topilib, unga nisbatan uzil kesil 12 yil 4 oy 24 kun ozodlikdan mahrum qilish jazosi tayinlandi.

• Andijon
• Bosh prokuratura
• Jinoyat
• Qotillik