Andijon viloyatining Asaka tumanidagi uyda yuz bergan yong‘inda bir kishi halok bo‘ldi. Bu haqda viloyat prokuraturasi matbuot xizmati xabar berdi.

Andijon FVB matbuot xizmati ma’lumotiga ko‘ra, yong‘in haqida xabar 28-iyul kuni soat 18:21 da kelib tushgan. Soat 18:26 da Yong‘in-qutqaruv ekipajlari voqea joyiga yetib borgan va yong‘in soat 18:54 da o‘chirilgan.

Viloyat prokuraturasi bergan ma’lumotga ko‘ra, “Nematobod” mahallasida joylashgan ushbu uyda avtomobillarga xizmat ko‘rsatish shoxobchasi tashkil etilgan bo‘lgan. Unda ishlovchi S. ismli shaxs ehtiyotisizligi oqibatida yong‘in kelib chiqqan. Yong‘in oqibatida u hodisa joyida vafot etgan.

Mazkur holat yuzasidan Jinoyat kodeksining 259-moddasi 2-qismi “a” bandi (yong‘in xavfsizligi qoidalarini buzish odam o‘limiga sabab bo‘lishi) bilan jinoyat ishi qo‘zg‘atilib, Asaka tuman ichki ishlar bo‘limi tomonidan tergov harakatlari o‘tkazilmoqda.

Bosh prokuratura matbuot xizmatiga ko‘ra, yong‘in oqibatida bir nafar shaxs vafot etganidan tashqari, yana bir kishi og‘ir tan jarohati olgan. Shoxobcha ichida bo‘lgan Labo avtomashinasi to‘liq yonib ketgan. Jinoyat ishi doirasida sud-tibbiy, yong‘in sabablari bo‘yicha yong‘in-texnikaviy va boshqa zarur ekspertizalar tayinlangan. Tergov harakatlari davom etmoqda.

• Andijon
• Bosh prokuratura
• FVB
• yong‘in