Huquqni muhofaza qiluvchi organlar tomonidan o‘tkazilgan tezkor tadbirlar natijasida Angren temir yo‘l yo‘nalishida poyezdlar harakati xavfsizligiga salbiy ta’sir qiluvchi o‘g‘irlik jinoyati bilan bog‘liq holatga chek qo‘yildi.

Xususan, Toshkent viloyatining Olmaliq shahrida yashovchi, 1995-yilda tug‘ilgan muqaddam o‘g‘irlik jinoyati sodir etganligi uchun sudlangan K.J., Xorazm viloyatining Urganch shahrida yashovchi, 1999-yilda tug‘ilgan S.S. va Namangan viloyatining To‘raqo‘rg‘on tumanida yashovchi, 1996-yilda tug‘ilgan M.F.lar joriy yilning may oyida Toshkent viloyatidagi “Aqcha-Obliq” temir yo‘l bekatlari oralig‘idan o‘tuvchi beton ustunlardagi yuk va yo‘lovchi poyezdlar elektrovozlarini yuqori kuchlanishli elektr energiyasi bilan ta’minlovchi simlarning jami 140 metrini kesib olib, “Damas” rusumli avtomashinaga yuklab, olib ketayotgan vaqtlarida qo‘lga olingan.

Ta’kidlash lozimki, mazkur shaxslar bunga qadar “Kuchlik-To‘ytepa” temir yo‘l bekatlari oralig‘idagi 87,5 metr elektr simlarini hamda “Ohangaron-Aqcha” temir yo‘l bekatlari oralig‘idagi 100 metr elektr simlarini kesib olib, sotib yuborishgan.

Jinoyat ishlari bo‘yicha Mirobod tuman sudi tomonidan K.J., S.S. va M.F.lar O‘zbekiston Respublikasi Jinoyat Kodeksining 169-moddasi
3-qismi “a” bandi bilan aybli deb topilib, ularning har biriga 5 yil 1 oy muddatga ozodlikdan mahrum qilish jazosi tayinlangan.

• Angren
• DXX