Patent hujjatlaridagi rasmda “quruq”, “ho‘l” va “suv osti” rejimlari sozlamalarini taklif qiluvchi iPhone kamera ilovasi ko‘rsatilgan.

“Apple” kompaniyasiga AQSh Patent va savdo belgilari idorasi tomonidan yomg‘irda iPhone’dan foydalanishni osonlashtiradigan “Namlik ta’sirida elektron qurilma funksionalligini takomillashtirish” nomli yangi patent berildi. Bu haqda “Phone Arena” ma‘lum qildi.

Qayd etilishicha, “Apple” iPhone ekranini yomg‘ir yoki suv ostida ishlatilganda uni namlikka chidamliligini maksimal darajaga yetkazmoqchi. Smartfon ekraniga suyuqlik kelib tushishi oqibatida paydo bo‘ladigan noto‘g‘ri teginishlar esa patentda nomi keltirilgan texnologiya tomonidan aniqlab yo‘q qilinadi. Shuningdek, ekran ho‘l bo‘lganda o‘ng tugmani bosish osonlashishi uchun ekrandagi boshqaruv tugmachalari kattalashadi.

Patent hujjatlaridagi rasmda “quruq”, “ho‘l” va “suv osti” rejimlari sozlamalarini taklif qiluvchi iPhone kamera ilovasi ko‘rsatilgan. Rejimga qarab kamera interfeysiga o‘zgartirishlar kiritiladi. Masalan, ho‘l rejimda ba’zi funksiyalar foydalanuvchi interfeysidan o‘chiriladi. Suv ostidagi rejimda esa ba’zi boshqaruv elementlari kattaroq tugmalar bilan almashtiriladi. Ularni suv ostida faollashtirish osonroq, lekin funksiyalar cheklangan bo’ladi.
Telefon displeyi suvga chidamlilik chegarasini ushlab turish uchun qurilmaning joriy chuqurligini ko‘rsatib turadi.

Shuningdek, kompaniya foydalanuvchilar chalkashib ketmasligi maqsadida kamera UI tugmalari hajmini kengaytirish va joylashuvini o‘zgartirishga alohida e’tibor berishi kerakligi aytgan.

Ta’kidlanishicha, “Apple” bir yil davomida juda ko‘p patent oladi. Ammo, bu ularning har biri yangi texnologiyaning darhol amalga oshirilishini anglatmaydi. Kompaniya ushbu patentni amalga oshirishdan manfaatdor bo‘ladimi yoki yo‘qmi – bunisi hali aniq emas.

• AQSh
• Apple
• texnologiya