Ma’lum qilinishicha, Apple yetkazib beruvchisi noroziliklarga sabab bo‘lgan xodimlarning ommaviy zaharlanishi tufayli Hindistondagi zavodida iPhone ishlab chiqarishni to‘xtatgan. Apple o‘zining Xitoyga qaramligini kamaytirish uchun pul tikayotgan Hindistondagi zavodida bunday mojaro birinchi marta bo‘layotgani yo‘q.
Ta’kidlanishicha, taxminan 17 ming kishi ishlaydigan zavod haftaning o‘rtalariga qayta ishga tushishi kutilmoqda. Ammo ishga 1000 nafar ishchi bilan qayta start berilishi qayd etilgan.
Bunga qadar zavodda ishlaydigan 250 dan ortiq ayol zaharlangani ma’lum bo‘lgan. Voqea noroziliklarni keltirib chiqargach, ishchilarning yashash sharoitlarini yaxshilashga e’tibor qaratilgan. Ularning aksariyati zavod yaqinidagi yotoqxonalarda yashovchi ayollar hisoblanadi.
Manbalardan birining xabar berishicha, Foxconn ishlab chiqarishni juda tez oshirganini tan olgan. Shuningdek, zavodni to‘liq quvvatda qayta ochishdan oldin asta-sekin modernizatsiya qilishini ta’kidlagan.
Agentlik so‘rov o‘tkazgan tahlilchilarning fikricha, iPhone 12’ni ishlab chiqaruvchi zavodning yopilishi mahsulot yetkazib berishga minimal ta’sir ko‘rsatishi mumkin. Shu bilan birga, yopilish koronavirus cheklovlari va davlat bayramlari keltirib chiqargan boshqa ta’minot muammolari fonida sodir bo‘lgan.
Qayd etilishicha, Apple Hindistonga katta pul tikib, 2017-yilda mamlakatda iPhone’larni yig‘ishni boshlab yuborgan. U yerda ishlab chiqarish uzoq muddatli istiqbolda strategik ahamiyatga ega, chunki Apple Vashington va Pekin o‘rtasidagi savdo urushlari fonida Xitoydan ta’minotga qaramligini kamaytirishga harakat qilmoqda.
Bu hindistonlik ishchilarning iPhone zavodlaridagi mehnat sharoitlariga qarshi birinchi marta chiqishi emas. 2020-yilda Apple Andxra-Pradeshda iPhone yig‘uvchi Tayvanning Wistron kompaniyasi bilan hamkorlikni to‘xtatgan. O‘shanda ish haqi qisqartirilgani va mehnat sharoitlaridan norozi bo‘lgan korxona xodimlari zavodda pogrom uyushtirgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!