“Yangi sanksiyalar ro‘yxatiga “Gazprom neft”, “Surgutneftegaz” va ularning o‘nlab sho‘ba korxonalari kiritildi. Ro‘yxatdan, shuningdek, 183 ta neft tankeri joy olgan, ularning ko‘pchiligi “soya floti” tarkibiga kiradi”, – deydi AQSh Moliya vazirligi o‘z bayonotida.

Shuningdek, “soya floti” kemalarini sug‘urtalashda ishtirok etgani uchun “Ingosstrax” va “Alfatraxovka” sug‘urta kompaniyalariga qarshi sanksiyalar joriy qilingan.

Ro‘yxatga Rossiyaning 30 dan ortiq neft-servis kompaniyalari, jumladan “Achimgaz”, “Gazprom shelfproyekt”, “Oil Service Garant”, shuningdek, Rossiya bilan bog‘liq bo‘lgan dunyoning turli nuqtalaridan o‘nlab kompaniyalar va shaxslar kiritilgan.

Shaxsiy sanksiyalarga “Gazprom neft” rahbari Aleksandr Dyukov, “Lukoyl” asoschisining o‘g‘li Yusuf Alekperov, “Lukoyl” bosh direktori Vadim Vorobev, “Surgutneftegaz” bosh direktori Vladimir Bogdanov va boshqalar kiradi.

Buyuk Britaniya Tashqi ishlar vazirligi ham “Gazprom neft” va “Surgutneftegaz” kompaniyalariga qarshi sanksiyalar joriy etilganini e’lon qilgan. Ma’lumotlarga ko‘ra, kompaniyalar bir kunda 1 million barreldan ortiq neft qazib oladi va ularning yillik daromadlari taxminan 23 milliard dollarni tashkil etadi.

• AQSh
• Buyuk Britaniya
• Rossiya
• Sanksiya
• neft