Argentina prezidenti Alberto Fernandes unga nisbatan qo‘zg‘atilgan COVID-19’ga qarshi choralarni buzganlikda ayblangan ishni hal qilish uchun kredit oldi. U ilmiy institutga katta miqdorda xayriya qilmoqchi, deb xabar bermoqda “Clarin” gazetasi. 

Ma’lum qilinishicha, Argentina rahbari 2021-yil iyul oyida rafiqasi Fabiola Yanesning tug‘ilgan kunini nishonlash vaqtida karantin choralarini buzganlikda ayblangan. Xususan, bayramdan olingan fotosuratlar matbuotda paydo bo‘lgan, u yerda Fernandes va uning rafiqasi o‘n nafar mehmonni qabul qilgani aks etgan kadrlar mavjud. Ta’kidlanishicha, prezident o‘z aybiga iqror bo‘lib, qilmishi uchun uzr so‘radi.

Sud Fernandes va prokuror o‘rtasidagi kelishuv bitimini tasdiqladi, unga ko‘ra u ixtiyoriy ravishda xayriya qiladi, shundan so‘ng ish yopiladi. 

Xabarda keltirilishicha, Fernandes uzoq muddatli munosabatlarga ega bo‘lgan xususiy bankdan 3 million peso (26 ming AQSh dollar) olgan. Mamlakat rahbari va uning rafiqasi Malbran ilmiy institutiga mos ravishda 1,6 million va 1,4 million peso o‘tkazadi.

Eslatib o‘tamiz, bir necha kun oldin Britaniya televideniyesi bosh vazir Boris Jonsonning karantin paytidagi ziyofat suratlarini namoyish qilgandi, biroq buning uchun u jarimaga tortilmadi. 

• Argentina
• Jarima
• Prezident
• koronavirus