Armaniston va Ozarbayjon bir necha o‘nlab yillar davom etgan mojarolaridan so‘ng tinchlik bitimi bo‘yicha kelishuvga erishdi. Bu haqda Ozarbayjon TIV rahbari Jeyhun Bayramov ma’lum qildi.

“Armaniston bilan tinchlik shartnomasi matni bo‘yicha muzokaralar jarayoni yakunlandi”, – dedi Bayramov.

Armaniston Tashqi ishlar vazirligi ham “Armaniston Respublikasi va Ozarbayjon Respublikasi o‘rtasida tinchlik va davlatlararo munosabatlar o‘rnatish to‘g‘risida”gi shartnoma imzolashga tayyorligini ma’lum qilgan.

“Yerevan hujjatni imzolash vaqti va joyi bo‘yicha Boku bilan maslahatlashuvlarni boshlashga tayyor”, deyiladi TIV bayonotida.

Armaniston Tashqi ishlar vazirligi, shuningdek, diplomatik kanallar orqali Ozarbayjon Tashqi ishlar vazirligiga Armaniston qo‘shni davlatning tinchlik kelishuvi loyihasining kelishilmagan ikki moddasi bo‘yicha takliflarini qabul qilishini ma’lum qilgan.

Bundan tashqari, Yerevan tinchlik shartnomasini kelishish bo‘yicha muzokaralarni yakunlash bo‘yicha qo‘shma bayonot e’lon qilishni taklif qilgani, biroq “rasmiy Boku bir tomonlama bayonot berishni ma’qul ko‘rgani” xabar qilingan.

Armaniston Bosh vaziri Nikol Pashinyan Ozarbayjon bilan muzokaralar yakunlanganini muhim voqea deb atagan.

Uning so‘zlariga ko‘ra, tinchlik bitimi matnida Yevropa Ittifoqining Armanistonda bo‘lgan kuzatuvchilari haqida hech qanday gap yo‘q, biroq uchinchi davlat kuchlarini kiritmaslik haqidagi band bor.

“Bu hujjat kuchga kirgach, Armaniston ham, Ozarbayjon ham chegaraning butun uzunligi bo‘ylab uchinchi davlat qo‘shinlarini joylashtirmasligi kerak, degan ma’noni anglatadi”, – deya tushuntirgan Pashinyan.

• Armaniston
• Ozarbayjon
• Tinchlik shartnomasi