AQSh hukumati iyul oyida Vashingtonda o‘tadigan NATO sammiti doirasida Armaniston va Ozarbayjonni tashqi ishlar vazirlari yig‘ilishiga taklif qildi. Bu haqda 28-iyun kuni Bokudagi brifingda so‘zlagan AQSh davlat kotibining Yevropa va Yevroosiyo masalalari bo‘yicha yordamchisi Jeyms O‘Brayen ma’lum qildi, deb yozadi “Meduza”.

“Davlat kotibi Entoni Blinken NATO bo‘yicha barcha hamkorlar, jumladan Armaniston va Ozarbayjon uchun tadbir o‘tkazmoqda. Shuning uchun ikkala davlat ham ishtirok etishini kutaman. Bu tashqi ishlar vazirlari darajasida amalga oshiriladi. Jami 30 ta hamkor davlat ishtirok etadi”, - dedi u.

Armaniston Tashqi ishlar vazirligi matbuot kotibi Ani Badalyanning TASS agentligiga ma’lum qilishicha, mamlakat “Vashingtondagi NATO sammiti va tegishli tadbirlarda sheriklik formatidagi tadbirda” ishtirok etishini tasdiqlagan. “Hozirda boshqa kelishuvlar yo‘q”, dedi Badalyan.

1949-yilda Shimoliy Atlantika shartnomasi imzolanganining 75 yilligiga bag‘ishlangan NATO yubiley sammiti 9-11-iyul kunlari Vashingtonda bo‘lib o‘tadi.

Armaniston ham xuddi Ozarbayjon kabi 1992-yilda NATO bilan hamkorlik qila boshlagan. Har ikki davlat 1994-yilda Alyansning “Tinchlik yo‘lida hamkorlik” dasturiga qo‘shilgan.

• Armaniston
• Ozarboyjon