Armanistonda hokimiyatni kuch bilan egallab olishga uringanlikda hamda bosh vazir va hukumat a’zolariga suiqasd uyushtirganlikda gumonlanib, sakkiz kishi hibsga olindi. Bu haqda "Armenpress" agentligi xabar berdi.

Qayd etilishicha, dastlabki tergov davomida oʻtkazilgan daliliy va boshqa harakatlar natijasida “Salibchilar” harbiy-vatanparvarlik jamiyati aʼzolari bir-birlari bilan o‘zlarida saqlanayotgan qurol va o‘q-dorilarni jinoyat quroli sifatida qo‘llash orqali hukumat vakolatlarini egallab olish to‘g‘risida oldindan oʻzaro kelishuvga erishganlari maʼlum boʻlgan.

Shuningdek, qo‘lga olinganlar Konstitutsiyada ko‘zda tutilmagan tartibda hukumat vakolatlarini o‘zlashtirib, hokimiyatni kuch bilan egallashga tayyorlanayotgani aniqlangan.

“Ko‘zdan kechirish chog‘ida o‘qotar qurollar, qurol-yarog‘lar, o‘q-dorilar, pnevmatik to‘pponchalar, o‘q o‘tkazmaydigan jiletlar, telekommunikatsiya vositalari, kompyuterlar, turli yozuv va hujjatlar bo‘lgan daftarlar topildi”, – deyiladi xabarda.

Arman matbuotining aniqlik kiritishicha, hibsga olinganlar orasida Armaniston bosh vaziri Nikol Pashinyan hayotiga suiqasd qilishda ayblanayotgan “Erkrap” ko‘ngillilar uyushmasi raisining sobiq o‘rinbosari Albert Bazeyan ham bor.

Hozirda hibsga olinganlar ustidan tergov davom etmoqda.

• Armaniston
• Pashinyan
• suiqasd