Bugun, 4-iyul kuni Avstraliyaning eng yirik shahri Sidneyda tinimsiz yogʻingarchiliklar oqibatida bir qancha chekka hududlarni suv bosganidan soʻng oʻn minglab shahar aholisini evakuatsiya qilish toʻgʻrisida yangi buyruq chiqarildi. Rasmiylar aholini kelgusida xuddi shunday ob-havo qayta kuzatilishidan ogohlantirishdi.

Qayd etilishicha, Avstraliyaning sharqiy qirgʻoqlari yaqinidagi kuchli va past bosimli tizim dushanba kunigacha Yangi Janubiy Uels (New South Wales) boʻylab kuchli yomgʻirga sabab boʻladi, chunki dam olish kunlari shtatning bir necha hududlarida taxminan bir oylik yomgʻir yogʻdi.

Shuningdek, Yangi Janubiy Uels shtatida 30 000 ga yaqin aholi evakuatsiya qilinmoqda, Sidney gʻarbidagi bir qancha uylar, fermer xoʻjaliklari va koʻpriklar bu yil uchinchi marta suv ostida qolgan. Tinimsiz suv toshqinlaridan keyin aholida umidsizlik paydo boʻla boshladi.

“Bu shunchaki halokatli holat. Biz hammasi yaxshi boʻlishi va oʻz oʻrniga qaytishiga ishonmaymiz. Ularning aksariyati (mahalliy aholi) oxirgi suv toshqinidan endigina chiqib, uylari va bizneslarini qayta tiklagan edilar. Afsuski, bu yana takrorlanmoqda”, deydi Kamden meri Tereza Fedeli.

Mahalliy OAVning xabar berishicha, Sidney janubida elektr quvvati yoʻqolib, qirgʻoqqa chiqib ketish xavfi ostida qolgan yuk kemasidan 21 nafar ekipaj aʼzosini qutqarish boʻyicha operatsiya davom etmoqda.

“Koʻp oylar mobaynida toshqin hodisasiga qarshi kurashish ancha qiyinchilik tugʻdirdi. Bu toshqin esa uni yanada qiyinlashtirmoqda”, – deydi Yangi Janubiy Uels (New South Wales) bosh vaziri Dominik Perrottet.

Avstraliya “tayyorlanmagan” edi

Meteorologiya byurosi maʼlumotlariga koʻra, yaqin 24 soat ichida Nyukasldan Sidney janubigacha boʻlgan Yangi Janubiy Uels (New South Wales) qirgʻoqlari boʻylab 300 km (186 milya) dan ortiq masofaga 100 millimetr (4 dyuym) yomgʻir yogʻishi mumkin.

“Biz bugun tushdan keyin yomgʻir yanada kuchayishini kutyapmiz”, deydi BoM meteorologi Jonatan Xou.

Shuningdek, dushanba kuni NASA ushbu hududda oʻz raketasini uchirmoqchi boʻlgan, lekin yomon ob-havo bunga yoʻl qoʻymagan.

“Avstraliya shimolidagi Arnhem kosmik markazidan dushanba kuni NASA raketasining uchirilishi yomon ob-havo tufayli 24 soatga choʻzildi”, deya xabar berdi Equatorial Launch Australia operatori.

Federal favqulodda vaziyatlar vaziri Myurrey Vatt hududga koʻproq yordam kuchini taklif qilgan, dushanba kuni hukumat suv toshqini oqibatlarini bartaraf etishda yordam berish uchun sunʼiy yoʻldoshning favqulodda boshqaruv tizimi faollashtirilishini aytgan.

• Avstraliya
• Jahon
• Qurbon
• suv_toshqini