Oliy taʼlim muassasalarining 1-kurs va oʻqishini koʻchirishga tavsiya etilgan talabalari uchun toʻlov-kontrakt mablagʻlarini toʻlash muddati 25-dekabrga qadar uzaytirildi. Bu haqda Oliy taʼlim, fan va innovatsiyalar vazirligi matbuot xizmati xabar berdi.

2023/2024-oʻquv yilida oliy taʼlim muassasalari bakalavriati va magistraturasiga toʻlov-kontrakt, jumladan, tabaqalashtirilgan toʻlov-kontrakt asosida talabalikka tavsiya etilgan abituriyentlar, oʻqishi koʻchirilgan (koʻchirib tiklangan) va qayta tiklangan talabalar oʻqishi uchun toʻlov haqini oʻtkazish hamda talabalar safiga qabul qilishni rasmiylashtirishning soʻnggi muddati 25-dekabr (shu kuni ham) etib belgilandi.

“Amaldagi tartibga koʻra, ikkinchi va undan yuqori bosqich talabalar kontraktini toʻlash muddati OTM rahbari tomonidan uzaytirilishi mumkin”, — deyiladi xabarda.

Qaror koʻpchilik abituriyentlar va ularning ota-onalari hamda oliy taʼlim muassasalari rahbarlarining murojaatlari inobatga olingan holda davlat komissiyasining tegishli bayoni bilan chiqarildi.

• Kontrakt
• Oliy ta'lim, fan va innovatsiyalar vazirligi
• Qaror
• Talabalar