Avvalroq, AOKA tomonidan respublikada faoliyat yuritayotgan OAV uchun Fargʻona viloyatiga media-tur tashkil etilganligi haqida xabar bergan edik.

Mazkur media-turning ikkinchi kunida OAV vakillarining eʼtibori dastlab, Bagʻdod tumanida yangi barpo etilgan Guliston shaharchasiga qaratildi. 

Oʻz navbatida, taʼkidlash joiz, Prezident tashabbusi bilan boshlanib, “Bagʻdod tajribasi” sifatida eʼtirof etilgan ushbu shaharchada 61 ta koʻp qavatli turar-joy binolari hamda mahalla binosi, kovorking markazi, madaniyat saroyi, poliklinika, maktabgacha taʼlim muassasasi, umumiy oʻrta taʼlim maktabi, sport-sogʻlomlashtirish va koʻplab savdo majmualari qad rostlagan.

Bagʻdod tumani hokimi Vosiljon Nazarovning taʼkidlashicha, markazdan 14 km uzoqlikda qurilgan yangi massiv hisobiga tumandagi 1 ming 200 dan ortiq oila uy-joy bilan taʼminlangan. Bundan tashqari, shaharcha aholisining bandligini taʼminlash, ular uchun real daromad manbalarini yaratish maqsadida, yondosh hududda har biri 10 sotixdan iborat 1 mingta issiqxona barpo etilmoqda. 

Bu issiqxonalarning 400 tadan ziyodrogʻi egalariga topshirilgan va ular yetishtirilgan dastlabki hosildan daromad olishni boshladilar. Shuningdek, “Muruvvat” kichik sanoat zonasida oʻnlab yangi tadbirkorlik loyihalari ish boshlashi, natijasida 280 dan ortiq ish oʻrinlari yaratildi. 

Tashrif doirasida press-tur ishtirokchilari yangi xonadon egalari bilan suhbatlashdilar; madaniyat markazida sanʼatning turli yoʻnalishlarida iqtidorga ega boʻlgan yoshlarning ijodiy jarayonlari bilan bevosita tanishdilar. Shuningdek, shaharchaga mos tarzda yangi qurib bitkazilgan zamonaviy maktab va bogʻchada yaratilgan shart-sharoitlarni koʻzdan kechirishdi. 

Bundan tashqari, yoshlar issiqxona majmuasida yosh dehqonlar tomonidan yetishtirilayotgan poliz mahsulotlaridan tatib koʻrib, sanoat zonasida ishlab chiqarilayotgan mahsulotlar turi va sifatiga qiziqishdi. Press-tur ishtirokchilari Qoʻqon shahrini chetlab oʻtishmadi. Respublika OAV vakillarini qabul qilgan galdagi manzil Qoʻqon erkin iqtisodiy zonasi boʻldi. 

Bu yerda eksport hajmi va ish oʻrni ortib borayotgan zona faoliyatida amalga oshirilayotgan ishlar borasida maʼlumotlar berilib, bir necha ishlab chiqarish zavodlariga xususan, 275 nafardan ortiq ishchi oʻrni yaratilgan erkaklar kiyimlari ishlab chiqaruvchi korxona hamda yiliga 70 ming dona mahsulot ishlab chiqarishga moʻljallangan velosiped zavodiga kichik ekskursiya tashkil etildi.

Umuman olganda 5 000 nafar ishchini tegishli ish oʻrinlari bilan taʼminlab, yil oxiriga qadar bu raqamlarni 6 000 ga yetkazishni maqsad qilgan erkin iqtisodiy zona 2021-yil oxiriga qadar ishlab chiqarish hajmini 1 trln. 800 mlrd. soʻm, eksport hajmini esa minimum 55 mln. AQSh dollariga yetkazishni maqsad qilgan.

• Farg‘ona
• Media-tur