Tojikiston prezidenti Imomali Rahmon aholi mobil aloqa uchun ko‘p pul sarflayotgani haqida gapirgan.

“Biz mobil telefondan foydalanish madaniyatini qayta ko‘rib chiqishimiz kerak. Bundan quvonishning hojati yo‘q, kelajakda jiddiy muammolar, turli kasalliklar, jumladan, miya saratoni paydo bo‘lishi mumkin”, – dedi u bugun mamlakat parlamentiga navbatdagi murojaati chog‘ida.

Shuningdek, Imomali Rahmon bolalar uchun o‘yinchoqlar o‘rnini telefonlar va kompyuterlar egallab olganini, buning oqibatlarini o‘ylash kerakligini aytdi. U so‘nggi 10 yil ichida Tojikiston aholisi mobil aloqa uchun 30 milliard somoniydan ortiq mablag‘ sarflaganini ta’kidlab o‘tgan.

“Bu deyarli 3 milliard dollar degani. Bu kichik summa emas. Bu mablag‘ evaziga biz Rog‘un GESi qurilishini yakunlashimiz mumkin”, – degan Imomali Rahmon.

Xabarda keltirilishicha, prezident mamlakat aholisining 90 foizi xorijiy kompaniyalarga tegishli mobil operatorlarga har yili 3 milliard somoniy to‘layotganidan norozi bo‘lgan. Uning so‘zlariga ko‘ra, ayni payt mamlakatda mobil aloqa abonentlari soni 8 milliondan, internetdan foydalanuvchilar soni esa 4,5 milliondan oshgan.

• Internet
• Prezident
• Tojikiston