Joriy yilning 20-30-yanvar kunlari Toshkentda boks boʻyicha 22 yoshgacha boʻlgan sportchilar oʻrtasida Osiyo chempionati oʻtkaziladi.

Tarixda ilk marotaba tashkil etilayotgan ushbu musobaqada qitʼamizning 15 ga yaqin mamlakatidan 150 nafardan ziyod yosh va umidli bokschilar gʻoliblik uchun bahs olib borishi kutilmoqda. Hozirda musobaqa oʻtadigan “Universal” sport majmuasida tayyorgarlik ishlari qizgʻin davom etyapti.

U-22 Osiyo chempionati rasman 22-yanvar kuni soat 17:00 da ochiladi. Ochilish marosimi tantanalaridan soʻng soat 18:00 dan dastlabki janglar boshlanadi.

Shu kuni soat 11:00 da “Hilton” mehmonxonasida musobaqa oldidan matbuot anjumani ham tashkil etiladi. Unda tashkilotchilar, xususan Osiyo boks federatsiyasi masʼullari ham ishtirok etishi rejalashtirilgan.

Qayd etilishicha, ushbu nufuzli musobaqaga Oʻzbekiston erkaklar terma jamoasini tajribali mutaxassis Toʻlqin Qilichev boshchiligidagi murabbiylar shtabi tayyorlagan boʻlsa, qizlarimiz Lochin Qoʻchqorov va Elshod Rasulovlar qoʻl ostida tayyorgarlik koʻrishgan. Biroq, pandemik vaziyat tufayli terma jamoamizning yakuniy tarkibi haligacha aniq boʻlgani yoʻq.

Oldinroq Osiyo chempionatida qitʼamizning 20 ga yaqin davlatidan 200 nafarga yaqin charm qoʻlqop ustalari qatnashishi kutilayotgan edi.

Ammo, soʻnggi vaqtlarda butun dunyoda pandemik vaziyat yana jiddiy tus olganligi va kasallanish holatlari tobora ortib borayotganligi bois bir qator mamlakatlar ushbu musobaqada qatnasholmasligini maʼlum qilgan.

Maʼlum qilinishicha, musobaqada erkaklar 13 ta vazn toifasida, qizlar esa 12 ta vaznda jang qilishadi. Mazkur chempionat qatʼiy karantin qoidalari asosida oʻtkaziladi va unga bemalol tomoshabinlar ham kirishi mumkin.

• Boks
• O‘zbekiston