Ijtimoiy tarmoqlarda Andijon viloyati perinatal markazi hududida noqonuniy ravishda daraxtlar kesilganligi haqidagi xabarlar tarqaldi.

Mazkur holat Bosh prokuratura o‘rganish olib borib, aybdorga nisbatan jinoiy ish qo‘zg‘atilganini ma’lum qildi.

Ma’lum qilinishicha, Andijon shahar obodonlashtirish boshqarmasi boshlig‘i Gʻ.Sh. tomonidan Andijon viloyati perinatal markazi hududidagi "Eldor qarag‘ayi" (Pinus eldarica) navli 12 tup daraxtlar qonunga xilof ravishda kesib yuborilgan va oqibatida tabiatga 115,5 mln. so‘m miqdorida zarar yetkazgan.

O‘tkazilgan tekshirish natijasiga ko‘ra, Andijon shahar obodonlashtirish boshqarmasi boshlig‘i Gʻ.Sh.ga nisbatan Jinoyat kodeksining 198-moddasi 2-qismi bilan jinoyat ishi qo‘zg‘atildi.

Hozirda holat yuzasidan tergov harakatlari olib borilmoqda.

Ma’lumot uchun, 2021-yil 30-dekabrda Prezidentining “Respublika ko‘kalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari to‘g‘risida”gi PF-46-sonli Farmoni bilan davlat o‘rmon fondiga kirmaydigan daraxtlar va butalar qimmatbaho navlarining kesilishiga moratoriyning amal qilishi muddatsiz davrga uzaytirilgan.

• Andijon
• Bosh prokuratura
• Jinoyat