20°
Kechasi 10°
2021-yilning 26-aprelida Bosh prokuratura binosida – ish joyida 33 yoshida vafot etgan sobiq xodim Samir Rahmonovning otasi Aʼzamjon Raxmonov Bosh prokuraturani sudga bergan edi.
Daʼvogar A.Raxmonovning sudga javobgar Bosh prokuraturaga nisbatan boquvchisini vafoti munosabati bilan nafaqa pulini undirish va maʼnaviy zararni qoplash to‘g‘risidagi daʼvo arizasini ko‘rib chiqish bo‘yicha sud jarayoni nihoyasiga yetib, sud qarori eʼlon qilindi.
Toshkent shahar sudlari Matbuot xizmati bergan maʼlumotga ko‘ra, sudning 2022-yil 10-martdagi ajrimi bilan daʼvogar A.Raxmanov vafot etganligi sababli uning javobgarga nisbatan nafaqa pulini undirish va maʼnaviy zararni qoplash to‘g‘risidagi daʼvo arizasi ish yurituvidan tugatilgan.
Sudning tashabbusi bilan daʼvogar tomonidan mustaqil talab bilan arz qiluvchi uchinchi shaxs sifatida jalb qilingan N. Raxmanova sudga javobgar Bosh prokuraturaga nisbatan turmush o‘rtog‘ining ish joyida vafoti munosabati bilan voyaga yetmagan farzandlari va o‘zi uchun nafaqa, sug‘urta tovoni va maʼnaviy zarar undirish to‘g‘risidagi daʼvo arizasi bilan qayta murojaat qilgan.
Maʼlum qilinishicha, Fuqarolik ishlari bo‘yicha Mirobod tumanlararo sudining 2022 yil 28 martdagi hal qiluv qaroriga asosan N.Raxmanovaning javobgar Bosh prokuraturaga nisbatan daʼvo talablari qisman qanoatlantirilgan.
Javobgardan N. Raxmanovaning foydasiga 951 275 952 so‘m miqdorida bir yo‘la to‘lanadigan nafaqa puli va 20 000 000 so‘m miqdorida maʼnaviy zarar undirilishi hamda davlat foydasiga 76 642 076 so‘m davlat boji to‘lanishi belgilandi.
Qoidaga ko‘ra, hal qiluv qaroriga nisbatan u qabul qilingan kundan eʼtiboran bir oy ichida Toshkent shahar sudi fuqarolik ishlari bo‘yicha sudlov hayʼatiga apellyatsiya shikoyati (protesti) berilishi mumkin.
Apellyatsiya tartibida ko‘rilgan hal qiluv qarori hamda apellyatsiya instansiyasi sudining ajrimi ustidan O‘zbekiston Respublikasi Oliy sudi fuqarolik ishlari bo‘yicha sudlov hayʼatiga apellyatsiya instansiya sudining ajrimi qabul qilingan kundan eʼtiboran bir yil ichida kassatsiya shikoyati (protesti) berilish mumkin.
Ish apellyatsiya tartibida ko‘rilmagan bo‘lsa, hal qiluv qarori ustidan kassatsiya tartibida shikoyat (protest) berilishi mumkin emas.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
