Namangan viloyatida bolalar zaharlangani holati yuzasidan jinoyat ishi qo‘zg‘atildi. Bu haqda Bosh prokuratura matbuot kotibi Hayot Shamsutdinov ma’lum qildi.

Qayd etilishicha, ushbu holat yuzasidan Jinoyat kodeksining 257-1-moddasi (sanitariyaga oid qonunchilikni yoki epidemiyaga qarshi kurash qoidalarini buzish) bilan jinoyat ishi qo‘zg‘atildi.

Hozirda tergov harakatlari olib borilmoqda.

Eslatib o‘tamiz, joriy yilning 21-sentyabr kuni Namangan viloyatida 71 nafar bolada zaharlanish alomatlari kuzatilgan va shifoxonaga olib kelingan. 22-sentyabrda esa Andijon viloyatida ham Antistrumin dorisining nojo‘ya ta’sirlari sabab 12 nafar bolada zaharlanish aniqlangan. 23-sentyabr kuni esa, Toshkent shahrida ham ko‘plab bolalar zaharlanib, shifoxonaga yotqizilgan.

Avvalroq Sog‘liqni savlash vaziri o‘rinbosari Elmira Bositxonova bolalarning zaharlanishiga ovqat ham, dori ham sabab bo‘lmaganini aytgan edi. Shunga qaramay aynan uning ko‘rsatmasi bilan maktab va bog‘chalarga tarqatilgan yod preparati iste’moli to‘xtatildi. O‘zbekiston Respublikasi Prezidenti Shavkat Mirziyoyev Namangan viloyatining Chust tumanida bolalarning zaharlanishi holatidan xabar topib, bundan qattiq tashvishdaligini bildirgandi. Prezident yordamchisi Saida Mirziyoyeva ham prezident topshirig‘i bilan Namangan viloyatiga borib zaharlangan bolalarning holidan xabar oldi.

• Andijon
• Jinoyat
• Namangan
• Zaharlanish