Korrupsiyaga qarshi kurashish agentligi tomonidan sog‘liqni saqlash tizimida “Korrupsiyasiz soha” loyihasining ijrosini ta’minlash maqsadida joylarda o‘rganishlar olib borilmoqda.

Mazkur tadbir doirasida Sog‘liqni saqlash vazirligi tizimidagi Tibbiyot xodimlarining kasbiy malakasini rivojlantirish markazining ko‘p tarmoqli klinikasida olib borilgan o‘rganishlar natijasida Klinika mansabdorlari va xodimlari tomonidan byudjet mablag‘larining maqsadsiz sarf qilinishi, o‘zlashtirish va talon-taroj qilish holatlari, aslida ishlamagan xodimlar uchun oylik ish haqlari to‘lab kelinishi kabi qator qonunbuzilishi holatlari aniqlandi.

Agentlikning Xabardor.uz’ga ma’lum qilishicha, ushbu holat bo‘yicha o‘tkazilgan o‘rganish yakuniga ko‘ra, Klinika faoliyatida jami 9 mlrd. 747 mln. 598 ming so‘mlik moliyaviy xato va kamchiliklar aniqlangan. Shundan 586 mln 798,2 ming so‘mlik byudjet mablag‘lari rastrata qilish yo‘li bilan talon-taroj qilinganligi ma’lum bo‘lgan.

Qayd etilishicha, mavjud aniqlangan holatlar yuzasidan to‘plangan hujjatlar qonuniy qaror qabul qilish uchun Bosh prokuraturaga yuborildi.

Shuningdek, Agentlik tomonidan taqdim etilgan hujjatlar asosida Bosh prokuratura huzuridagi Departament tomonidan mazkur klinika mansabdor shaxslariga nisbatan kodeksining 167-moddasi 3-qismi “a” bandi bilan jinoyat ishi qo‘zg‘atildi.

Hozirda, mazkur holat yuzasidan prokuratura organlari tomonidan dastlabki tergov harakatlari olib borilmoqda.

• Aksilkorrupsiya
• Bosh prokuratura
• Jinoyat
• Korrupsiya