Amerikaning “Time” jurnali oʻquvchilari Braziliya prezidenti Jair Bolsonaruni “Yil odami” deb topishdi.

Soʻrovnomada ishtirok etgan oʻquvchilarning 24 foizi (9 million kishi) Bolsonaru uchun ovoz berishgan. Ikkinchi oʻrinni AQShning sobiq prezidenti Donald Tramp, uchinchi oʻrinni koronavirus pandemiyasi davrida odamlarning hayotini saqlab qolish uchun kurashgan tibbiyot xodimlari egallaganlar.

Toʻrtinchi oʻrindan rus muxolifatchisi Aleksey Navalniy, beshinchi oʻrindan esa koronavirusga qarshi vaksinalarni ixtiro qilishga oʻz hissasini qoʻshgan olimlar joy olishgan.

Braziliya prezidenti koronavirusdan davolanishda tibbiyot hamjamiyati tan olmagan vositalarni taklif qilgani uchun mahalliy siyosatchilar va jahon hamjamiyati tomonidan keskin tanqid qilingan edi. 2021 yilning oktyabr oyida Braziliya yetakchisining YouTube platformasidagi akkaunti COVID-19 ga oid feyk xabarlarni tarqatish ayblovi bilan bloklab qoʻyilgan.

Eslatib oʻtamiz, “Time” jurnali oʻquvchilari orasidagi onlayn soʻrovnoma 1998-yildan beri oʻtkazib kelinadi. Oʻquvchilar va tahririyatning tanlovi koʻp hollarda turlicha boʻladi.

• Jahon
• qiziqarli