Tramp avval Putin bilan so‘ngra Zelenskiy bilan telefonlashdi.

Rossiya Prezidenti Vladimir Putin kecha, 12-fevral kuni Amerika Qo‘shma Shtatlari yetakchisi Donald Tramp bilan telefon orqali muloqot o‘tkazdi. Ikki davlat rahbarlarining telefon orqali muloqoti haqida Rossiya Prezidenti matbuot kotibi Dmitriy Peskov brifingda ma’lum qilgan.

Ta’kidlanishicha, ushbu muloqot Rossiya va AQSh rahbarlarining so‘nggi uch yildagi ilk suhbati bo‘lgan.

“Prezident Putin va AQSh Prezidenti Donald Tramp yaqinda telefon orqali muloqotni yakunladi. Bu juda uzoq telefon suhbati edi, deyarli bir yarim soat davom etdi”, – degan Peskov brifingda.

Qayd etilishicha, Tramp so‘nggi haftalarda Rossiya Prezidenti bilan gaplashish rejalarini bir necha bor ta’kidlagan. Hozirda Amerika rahbari Ukrainadagi mojaroga katta e’tibor qaratgan va uni tugatishga yordam berish istagini bildirgan.

Suhbat davomida Rossiya Prezidenti esa Trampning Moskva va Vashington birgalikda ishlashi kerakligi haqidagi fikriga qo‘shilishini aytgan.

Ma’lum bo‘lishicha, Rossiya va AQSh yetakchilari telefon suhbatida Yaqin Sharqdagi kelishuv, Eron yadro dasturi va Rossiya-Amerika munosabatlarini muhokama qilgan.

Kreml vakilining so‘zlariga ko‘ra, Rossiya yetakchisi AQSh Prezidentini Moskvaga taklif qilgan. Putin va Tramp shaxsiy uchrashuv tashkil etishga kelishib olgan.

Putin Tramp bilan suhbatda amerikalik rasmiylarni Rossiyada qabul qilishga, jumladan, Ukraina muammosini hal qilishga tayyorligini ma’lum qilgan.

Bundan tashqari, AQSh Prezidenti Donald Tramp 12-fevral kuni Rossiya yetakchisi Vladimir Putin bilan suhbatlashganidan so‘ng Ukraina Prezidenti Vladimir Zelenskiy bilan ham telefon orqali muloqot qilgan. Bu haqda Tramp o‘zining Truth Social tarmog‘ida ma’lum qilmoqda.

Amerika yetakchisi telefon muloqotini yaxshi o‘tdi deb baholagan.

“Men hozirgina Ukraina Prezidenti Vladimir Zelenskiy bilan suhbatlashdim. Suhbat juda yaxshi o‘tdi. U ham, Prezident Putin ham tinchlikka erishishni istaydi. Biz urush bilan bog‘liq ko‘plab mavzularni muhokama qildik, biroq asosan juma kuni Myunxenda bo‘lib o‘tadigan uchrashuv haqida gaplashdik. Delegatsiyaga vitse-prezident Jey Di Vens va Davlat kotibi Marko Rubio rahbarlik qiladi. Umid qilamanki, ushbu uchrashuv natijalari ijobiy bo‘ladi. Bu bema’ni urushni to‘xtatish vaqti keldi, u behisob va mutlaqo keraksiz o‘lim va vayronagarchiliklarga sabab bo‘ldi. Xudo Rossiya va Ukrainani asrasin!” – deb yozdi Tramp.

Zelenskiyning maslahatchisi Dmitriy Litvinning so‘zlariga ko‘ra, Tramp va Zelenskiy taxminan bir soat davomida suhbatlashgan. Zelenskiy telefon suhbati yuzasidan izoh berar ekan, Tramp uni Rossiya Prezidenti bilan avvalroq bo‘lib o‘tgan muzokaralar haqida xabardor qilganini ma’lum qilgan.

• AQSh
• Putin
• Tramp
• Zelenskiy