Kuni kecha “Bunyodkor”ning faoliyatini yanada rivojlantirish borasida klub prezidenti Mehriddin Abdullayev va masʼul mutaxassislar ishtirokida navbatdagi yigʻilish oʻtkazilgan.

Unda futbol klubi prezidenti ayniqsa “Bunyodkor”ning bugungi kundagi yosh futbolchilarni tayyorlash tizimini tanqid ostiga olgan.

Malakali murabbiylar, skaut, seleksioner va shu kabi boshqa zamonaviy kadrlar bilan taʼminlanish,yuqori iqtidorga ega boʻlgan yosh futbolchilarni tanlash va saralab olishdan iborat boʻlgan seleksiya tizimi, futbolchilarning jismoniy tayyorgarlik holati, ularni professional sportchilar sifatida tayyorlash metodologiyasi, futbol infratuzilmasi va akademiyaning moddiy-texnika bazasini yanada rivojlantirish va mustahkamlash va shu kabi masalalarga oid kamchiliklarni imkon qadar qisqa fursat ichida toʻliq bartaraf etish taʼkidlangan.

Yuqoridagilardan kelib chiqib, “Bunyodkor” futbol klubi prezidenti tomonidan tashkiliy masala koʻrilgan hamda “Bunyodkor” futbol akademiyasiga yangi direktor tayinlangan.

Ushbu lavozimga yurtimiz futbolidagi koʻzga koʻringan vakillardan biri Azizbek Haydarov loyiq topilgan.

Oʻz vaqtida “qaldirgʻochlar” safida uzoq yillar davomida toʻp tepgan Azizbek Haydarov endilikda “Bunyodkor” FKda mahoratli futbolchilarni tayyorlash tizimida faoliyat olib boradi.

• Bunyodkor
• Futbol
• O‘zbekiston
• Tayinlov