Buxoroda “narkotik” vositalar savdosida gumonlanib IIBga chaqirilgan fuqaro vafot etdi.

Bosh prokuratura matbuot kotibi Hayot Shamsutdinovning Xabardor.uz’ga ma’lum qilishicha, voqea 2022-yil 17-yanvar kechki vaqt sodir bo‘lgan va bu haqda Buxoro viloyati prokuraturasiga xabar berilgan.

Hodisa joyiga viloyat prokurori, viloyat IIB boshlig‘i va tuman hokimi hamda viloyat prokuraturasi tergov-tezkor guruhi chiqqan.

Aniqlanishicha, o‘sha kuni Gʻijduvon tuman ichki ishlar boshqarmasiga fuqaro F.Q. ariza bilan murojaat qilib, unda hududda giyohvandlik moddasi savdosi bilan shug‘ullanib kelayotgan “Asliddin” ismli shaxsga chora ko‘rishni so‘ragan.

Ariza asosida ichki ishlar tezkor xodimlari tomonidan o‘tkazilgan tezkor tadbirda ariza muallifi F.Q.ga 3 dona “Spichki” yozuvli gugurt qutilariga joylashtirilgan 12,61 gramm “marixuanna” giyohvandlik moddasini 1 mln. 350 ming so‘mga sotgan A.R.  ushlangan.

Ashyoviy dalillar bilan ushlangan A.R. bilan o‘tkazilgan surishtiruv jarayonida u “marixuanna” giyohvandlik moddasini tumandagi “Gʻishti” qishlog‘ida yashovchi I.T.dan (1960 yilda tug‘ilgan) sotib olganligi haqida iqrorlik ko‘rsatuvlarini bildirgan.

Ushbu holatga aniqlik kiritish maqsadida fuqaro I.T. tumandagi  4-sonli IIBga taklif etilgan.

Ichki ishlar bo‘limiga yetib kelgan I.T.ning sog‘ligi yomonlashgan hamda xodimlar tomonidan zudlik bilan tez tibbiy yordam  chaqirilgan. Biroq, yetib kelgan shifokorlar fuqaro I.T.ning vafot etganini qayd etgan.

Viloyat prokuraturasi bergan dastlabki xulosalarga ko‘ra, tergov-tezkor guruhi tomonidan 4-sonli IIB ma’muriy binosi, xizmat xonalari va bino yon atrofi ko‘zdan kechirilib, holatga aloqador izlar yoki shubhali holatlar aniqlanmagan.

Bundan tashqari, binoga o‘rnatilgan kuzatuv kameralari ko‘zdan kechirilgan hamda ularning xotira moslamalari olib qo‘yilgan.

Shuningdek, I.T.ning  o‘g‘li Sh.T. hodisa joyiga chaqirilib, uning ishtirokida murda ko‘zdan kechirildi. Murdani ko‘zdan kechirish jarayonida  uning murda tanasida tan jarohatlari
yoki uning izlari aniqlanmagan.

Tibbiy ekspertiza birlamchi xulosasiga asosan fuqaro I.T.ning o‘limiga yurak qon tomirlar trombozi, o‘pka yallig‘lanishi oqibatida kelib chiqqan o‘tkir yurak qon tomir yetishmovchiligi sabab bo‘lgan.

Bundan tashqari, tuman tibbiyot birlashmasining ma’lumotiga ko‘ra, I.T. muqaddam yurak xuruji bo‘yicha davolanib kelganligi hamda jarrohlik amaliyoti orqali bitta buyragi olib tashlanganligi aniqlangan.

Hozirda, fuqaro A.R.dan giyohvandlik moddasi olinganligi holati yuzasidan Gʻijduvon tuman IIB TB tomonidan unga nisbatan JKning 273-moddasi 5-qismi jinoyat ishi qo‘zg‘atilib, dastlabki tergov harakatlari olib borilmoqda.

Bundan tashqari, I.T.ning vafot etganligi holati yuzasidan viloyat prokuraturasi tomonidan tergovga qadar tekshiruv harakatlari o‘tkazilmoqda.

Tekshiruv davomida, Gʻijduvon tuman IIB xodimlarining harakatlariga qonuniy baho berilishini ta’minlash maqsadida xizmat tekshiruvi tayinlangan.

Tergovga qadar tekshiruv natijasi yuzasidan qo‘shimcha ravishda ma’lumot beriladi.

• Buxoro
• Giyohvandlik
• IIB
• Jinoyat