Avvalroq, Buxoro viloyatining Kogon shahrida ikki nafar ishchining ish jarayonida tuproq ostida qolishi oqibatida halok bo‘lgani haqida xabar berilgan edi.

Viloyat IIB hozirda ishchilarning shaxsiga aniqlik kiritilgani va holat yuzasidan jinoyat ishi qo‘zg‘atilganini ma’lum qildi.  
Ma’lum qilinishicha, joriy yil 16-noyabr kuni taxminan soat 15:30 larda Buxoro shahrida joylashgan “61-sonli avtokorxona” MChJ tomonidan Kogon shahar Do‘stlik mahallasi Do‘stlik ko‘chasi hududida kanalizasiya quvurlarini qazish ishlari olib borilayotgan vaqtda, kanalizatsiya quvuri uchun kovlangan o‘lchamlari – 4x5 metr, chuqurligi 4 metr bo‘lgan o‘raning atrofidagi qum uyumi o‘pirilib tushishi natijasida, quvur ichida ishlayotgan “61-sonli avtokorxona” MChJ ishchilari 2000-yilda tug‘ilgan A.N. hamda 1999-yilda tug‘ilgan S.S. lar qum uyumi ostida qolib ketib, havo yetishmasligi oqibatida vafot etganlar.

Hodisa sodir bo‘lgan joyga chiqqan Buxoro viloyati IIB, FVB, Kogon shahar prokuraturasi, IIB mas’ul rahbar va xodimlaridan iborat tarkibda tergov-tezkor guruhi tomonidan holat tegishli tartibda rasmiylashtirilgan.

Jabrlanuvchilarning jasadlari viloyat FVB xodimlari tomonidan qum uyumi ostidan olib chiqilib, sud-tibbiy ekspertiza ko‘rigidan o‘tkazilgan.

Mazkur holat yuzasidan Buxoro viloyat IIB huzuridagi Tergov boshqarmasi tomonidan JKning 257-moddasi 2-qismi “a” bandi bilan jinoyat ishi qo‘zg‘atilib, dastlabki tergov harakatlari olib borilmoqda.

• Buxoro
• FVV