Ijtimoiy tarmoqlarda ko‘chat ekish bilan bog‘liq soxtakorlik aks etgan videolavha yuzasidan rasmiy ma’lumot berildi.

Aniqlanishicha, mazkur holat Namangan viloyati Pop tumani "Sang" qishlog‘ida sodir bo‘lgan.

Tuman hokimligi matbuot xizmatining ma’lum qilishicha, Pop tumanida mahallalar kesimida olib borilayotgan ko‘chat ekish ishlarida Sang qishlog‘i Bog‘ ko‘cha mahallasi mutasaddilarining soxta ko‘chat o‘tqazish tadbirini amalga oshirganligi holati kuzatilgan.

Joriy yilning 26-noyabr kuni tumanning Sang qishlog‘i "Bog‘ ko‘cha" mahallasi raisi boshchiligida Meros ko‘chasida ko‘chat ekish ishlari olib borilgan va aynan mahalla raisining ko‘rsatmasi bilan ko‘chat ekish jarayoni sahnalashtirilib, suratga olingan.

Mazkur holat yuzasidan "Bog‘ ko‘cha" mahalla raisi Qahramon Ochildiyev, mahalla raisining Obodonlashtirish, tomorqa va tadbirkorlik masalalari bo‘yicha o‘rinbosari hamda ushbu hududga bog‘langan mahalla va oilani qo‘llab-quvvatlash bo‘limi mas’ul xodimi Mansurjon Akbarovlarga tegishli chora ko‘rilgan va egallab turgan lavozimlaridan ozod qilingan.

Shuningdek, mahallada olib borilgan ko‘chat ekish ishlarini nazoratga olmaganligi uchun – tuman hokimining o‘rinbosari, mahalla va oilani qo‘llab-quvvatlash bo‘limi boshlig‘i Erkinjon Asqarovga nisbatan "Hayfsan" e’lon qilingan.

• Namangan
• qiziqarli