“O‘yinchoqlar tarixi” (“Toy story”), “Muzyurak” (“Frozen”) va “Zootopiya” singari mashhur animatsion filmlarining davomi yaratiladi. Qayd etilishicha, multfilmlarning yangi qismlari allaqachon ishlab chiqilmoqda. Bu haqda “Disney” (kompaniya 1923-yil 16-oktyabrda tashkil etilgan) bosh direktori Bob Iger kompaniyaning birinchi chorakdagi daromadlari to‘g‘risidagi hisobotni taqdim qilish chog‘ida ma’lum qilgan.

“Disney” rahbari yaqin vaqt ichida kartinalar haqida batafsil ma’lumotlar paydo bo‘lishiga va’da berdi. U, shuningdek, ushbu loyihalarni “betakror brendlar va franshizalarga tayanishning eng yorqin misoli” sifatida baholagan.

Ushbu barcha franshizalarning so‘nggi filmlari katta ekranda global prokat xitlariga aylandi: “Muzyurak 2” 2019-yilda 1,45 milliard dollar daromad keltirdi va dunyodagi eng qimmat animatsion loyihalardan biri hisoblanadi. “Pixar”ning “O‘yinchoqlar tarixi 4” loyihasi esa aynan 2019-yilda butun dunyo bo‘ylab 1,07 milliard dollar mablag‘ “ishlagan” va “Zootopiya” 2016-yilda 1,02 milliard dollar daromad keltirgan.

Taqqoslash uchun, “Disney”ning eng yangi animasion loyihalari davomli bo‘lishi haqida mish-mishlar ham mavjud emas. Chunki “Gʻalati dunyo” animatsiyasi dunyo bo‘ylab 74 million dollardan kamroq, “Enkanto” (2021-yilda “Oskar”ga loyiq ko‘rilgan) myuzikli esa 256 million dollar “kassa yig‘gan”.

Qayd etish mumkin, “Frozen”, “O‘yinchoqlar tarixi 3”, “O‘yinchoqlar tarixi 4” va “Zootopiya” loyihalari o‘z davrida eng yaxshi animatsion film sifatida “Oskar” mukofotiga sazovor bo‘lgan. Bundan tashqari, ularning barchasi dunyodagi eng ko‘p daromad keltirgan multfilmlar top-10 ro‘yxatida mavjud.

• Multfilm
• Oskar