Endilikda dissertatsiya tayyorlamasdan fan doktori unvonini olish mumkin bo‘ladi. Bu haqda “Oliy malakali ilmiy va ilmiy-pedagog kadrlarni attestatsiyadan o‘tkazish tizimini yanada takomillashtirish chora-tadbirlari to‘g‘risida”gi Prezident qarori jamoatchilik muhokamasiga qo‘yildi.

Unga ko‘ra, O‘zbekiston Respublikasi Vazirlar Mahkamasi huzuridagi Oliy attestatsiya komissiyasi (OAK), O‘zbekiston Respublikasi Oliy va o‘rta maxsus ta’lim vazirligi, Innovasion rivojlanish vazirligi hamda Fanlar akademiyasining:

O‘zbekiston Respublikasining xalqaro bitimlari va shartnomalari, O‘zbekiston Respublikasi Prezidenti va Hukumatning hujjatlarida nazarda tutilgan hollarda mutaxassislarni maqsadli tayyorlash asosida xorijiy oliy ta’lim muassasalari tomonidan berilgan ilmiy darajalar to‘g‘risidagi hujjatlarni to‘g‘ridan-to‘g‘ri (ekspertizadan o‘tkazmasdan) tan olish;

dissertatsiya tayyorlamasdan oliy ta’lim va ilmiy tashkilotlar kengashlari qarori bilan nashr etilgan yakka mualliflikdagi monografiya taqdimnomasi muhokamasi asosida ilmiy darajalar beruvchi ilmiy kengash qaroriga ko‘ra falsafa doktori (PhD) ilmiy darajasini berish;

dissertatsiya tayyorlamasdan aniq vazifalarni hal etish bo‘yicha ilmiy ishlanmalar, ichki va tashqi bozorlarda talab yuqori bo‘lgan ilg‘or texnologik ishlanmalar muallifiga taqdimnomani Yoshlar akademiyasi Kengashning tavsiyasi asosida falsafa doktori (PhD) ilmiy darajasini berish (tibbiyot fanlari bundan mustasno);

dissertatsiya tayyorlamasdan muayyan tarixiy, siyosiy, arxitektura va san’atshunoslik yo‘nalishidagi tadqiqot natijalari bo‘yicha kamida to‘rtta ilmiy yangiligi taqdimoti “O‘zbekiston tarixi” telekanalida o‘tkazilgan va ilmiy yangiliklari badiiy yoki hujjatli filmlar ssenariylarida foydalanilganligi bo‘yicha taqdimnoma va ilmiy darajalar beruvchi ilmiy kengash qarori asosida tadqiqot muallifiga o‘rnatilgan tartibda tarix, siyosiy, arxitektura va san’atshunoslik fanlari bo‘yicha falsafa doktori (PhD) ilmiy darajasini berish;

belgilangan talablarga javob bergan holda oliy ta’lim va ilmiy tashkilotlar kengashlari qarori bilan ilmiy darajalar beruvchi ilmiy kengashlarni mustaqil ravishda tuzish va xabardor qilish tartibida ro‘yxatga olish uchun OAKga yuborish;

fan doktori (DSc) ilmiy darajasini beruvchi ilmiy kengash tarkibiga Xirsh indeksi kamida ikki bo‘lgan yukori malakali va tajribali professor ilmiy unvoniga ega bo‘lgan fan nomzodi, falsafa doktorini (PhD) kiritish;

dissertatsiyalarni yetakchi tashkilotda qo‘shimcha muhokamadan o‘tkazish tartibini bekor qilish;

barcha fanlar bo‘yicha dissertatsiyalarning ilmiy seminarlardagi muhokamasi va ochiq himoyasini o‘tkazish jarayonini internet tarmog‘i orqali real vaqt rejimida kuzatish amaliyotini joriy etish (xizmat doirasida foydalanish uchun va boshqa grifli dissertatsiyalar bundan mustasno);

ilmiy darajalar beruvchi ilmiy kengashda talabgorlarni ilmiy darajada tasdiqlashni “ochiq” ovoz berish yo‘li bilan amalga oshirishni yo‘lga qo‘ygan holda ilmiy kengashda ovoz berish jarayonini o‘tkazuvchi hisob komissiyasini tuzish va “yopiq” ovoz berish tartibini bekor qilish haqidagi takliflariga rozilik beriladi.

• Ilmiy unvon
• Oliy ta'lim
• PhD
• Prezident
• Qaror
• Vazirlar Mahkamasi