Kecha, 11-aprel kuni soat 21:53 da A-373 Toshkent–O‘sh avtomobil yo‘lining Qamchiq dovonidan o‘tgan qismida Toshkent—vodiy yo‘nalishida harakatlangan Changan rusumli avtotransport vositasida yong‘in yuzaga kelgan.

Yong‘inga avtomobil yukxonasida bo‘lgan elektroskuterning quvvatlagichida yuzaga kelgan qisqa tutashuv sabab bo‘lgan. Bu haqda Favqulodda vaziyatlar vazirligi xabar berdi.

Vaziyat haqida Qamchiq maxsus qidiruv, yong‘in-qutqaruv boshqarmasiga xabar qilingan.

Shunga ko‘ra 2 ta yong‘in-qutqaruv ekipaji soat 22:09 da voqea joyiga yetib borib, yong‘in soat 22:11 da o‘rab olingan va soat 22:12 da yong‘in to‘liq bartaraf etilgan.

Yong‘in oqibatida avtotransport vositasining salon qismi hamda yukxonasi yonib zararlangan. Tezkor harakatlar natijasida yukxonada bo‘lgan 18 ta velosipeddan 9 tasi va 4 ta elektroskuterdan 1 tasi yong‘indan saqlab qolingan.

Xabarga ko‘ra, hodisa oqibatida tan jarohati olgan va halok bo‘lganlar yo‘q.

• Qamchiq
• yong‘in
• yuk mashinasi