DXX va DBQ xodimlari tomonidan olib borilgan tezkor-qidiruv tadbirlarida giyohvandlik moddalarining noqonuniy savdosining oldi olindi.

Xususan, Jizzax viloyatida o‘tkazilgan tezkor tadbirda qozog‘istonlik 1976-yilda tug‘ilgan fuqaro va Zomin tumanida yashovchi 1989-yilda tug‘ilgan mahalliy fuqaro 3,88 kilogramm opiy giyohvandlik moddasini 32 ming AQSh dollariga sotayotgan vaqtlarida ashyoviy dalillar bilan ushlandi.

Shuningdek, Toshkent viloyatida o‘tkazilgan tezkor tadbirlarda 37 yoshli Rossiya fuqarosi hamda 58 va 53 yoshli ikki nafar Qirg‘iziston fuqarosi 9,612 kilogramm gashish giyohvandlik moddasi bilan, shuningdek, 38 yoshli Tojikiston fuqarosi 1,784 kilogramm opiy va 3,765 kilogramm gashish moddalari bilan ushlangan.

Samarqand viloyatida o‘tkazilgan tezkor tadbirda esa muqaddam giyohvand moddalar bilan bog‘liq jinoyat sodir etgani uchun sudlangan, 1984-yilda tug‘ilgan mahalliy fuqaro 10,3 kilogramm opiy moddasi bilan qo‘lga olingan.

DXXning Toshkent viloyati bo‘yicha boshqarmasi hamda viloyat bojxona boshqarmasi xodimlari hamkorligida o‘tkazilgan tezkor tadbirda muqaddam giyohvand moddalar bilan bog‘liq jinoyat sodir etgani uchun sudlangan 29 yoshli fuqaro o‘zining Nexia-3 rusumli avtomashinasida Qo‘qon shahriga ketayotgan vaqtida Ohangaron tumanidagi “Chinor” yo‘l patrul xizmati maskanida to‘xtatilgan. Biroq u YPX xodimlari talablariga bo‘ysunmasdan qochishga uringanida, sun’iy to‘siq yaratilib, ushlangan.

Avtomashina ko‘zdan kechirilganda, uning salon qismida 4,902 kilogramm gashish moddasi borligi aniqlanib, prosessual tartibda rasmiylashtirib olingan.

Davlat xavfsizlik xizmatining Andijon viloyati bo‘yicha boshqarmasi xodimlari o‘tkazgan tezkor tadbirda esa Toshkent shahri tomon harakatlangan Cobalt avtomashina yo‘l harakati xavfsizligi xodimlarini jalb etgan holda Bo‘ston tumanidagi yo‘l patrul xizmati maskanida to‘xtatilib, ko‘zdan kechirilgan.

Tekshiruv davomida mashinada yo‘lovchi sifatida ketayotgan Oltinko‘l tumanida yashovchi, 1977-yilda tug‘ilgan, muqaddam sudlangan shaxsning yonida 961 gramm opiy moddasi borligi aniqlangan.

Dastlabki surishtiruv jarayonlarida u mazkur narkotikni Andijon shahrida istiqomat qiluvchi, muqaddam giyohvand moddalar bilan bog‘liq jinoyat sodir etgani uchun sudlangan, 1974-yilda tug‘ilgan Qirg‘iziston fuqarosidan olgani ma’lum bo‘lib, ushbu shaxs ham ushlangan. Shuningdek, uning yashash manzilida 240 gramm opiy moddasi borligi aniqlanib, protsessual tartibda rasmiylashtirib olingan.

Ta’kidlash lozimki, o‘tkazilgan tezkor tadbirlar natijasida musodara qilingan jami 17 kilogramm 165 gramm opiy va 18 kilogramm 279 gramm gashish giyohvand moddalari Tojikiston va Qirg‘izistondan kontrabanda yo‘li bilan olib o‘tilgan.

Hozirda mazkur shaxslarga jinoyat ishlari nisbatan qo‘zg‘atilgan hamda ularning jinoiy aloqalarini aniqlash bo‘yicha zarur chora-tadbirlar amalga oshirilmoqda.

• DXX
• IIB