Ma’lumotlarga ko‘ra, Samarqanddan Urganchga sement mahsulotlari olib kelgan yuk avtomashinasidan 10 kilo narkotik moddasi topilgan.

Davlat xavfsizlik xizmatining Xorazm viloyati bo‘yicha boshqarmasi xodimlari tomonidan Bojxona organlari xodimlarini jalb qilgan holda o‘tkazilgan tezkor tadbirda, yuk avtomashinasi to‘xtatilib, ko‘zdan kechirilgan.

Natijada avtomashinada sement mahsulotlari solingan qoplar ichiga yashirib qo‘yilgan 10 dona o‘ramda 9 kilogramm 754 gramn opiy moddasi borligi aniqlanib, protsessual tartibda rasmiylashtirib olingan.

Maʼlum bo‘lishicha, Urgut tumanida yashovchi, 1971-yilda tug‘ilgan, muqaddam giyohvand moddalar savdosi bilan bog‘liq jinoyatlari uchun uch marotaba sudlangan shaxs yuk avtomashinasini buyurtma qilib, sement mahsulotlari niqobi ostida giyohvand moddalarni Xorazm viloyatiga sotish uchun olib kelgan.

Ushbu narkotik moddalar Tojikistondan kontrabanda yo‘li bilan keltirilgan.

Hozirda DXX Xorazm viloyati bo‘yicha boshqarmasi Tergov bo‘limi tomonidan mazkur shaxsga nisbatan Jinoyat kodeksining 28,246-moddasi 2-qismi va 25,273-moddasi 5-qismi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.

• DXX
• Giyohvandlik
• Jinoyat
• Samarqand
• Tojikiston
• Xorazm