Endi talabalar bilan tuzilgan koʻchmas mulk ijara shartnomalarini ham E-ijara interaktiv xizmatida hisobga qoʻyish mumkin. Bu haqda Davlat soliq qoʻmitasi xabar berdi.

Qayd etilishicha, ijaraga beruvchi ijara.soliq.uz saytiga kirib “Ijaraga oluvchi toʻgʻrisida maʼlumot” oynasiga ijaraga oluvchi talabaning JShShIRni kiritganda talabaga oid maʼlumotlar (F.I.O, taʼlim olayotgan oʻquv yurti, fakulteti, taʼlim shakli va bosqichi, shuningdek doimiy roʻyxatga olingan manzili) avtomatik shakllanadi.

“Telefon raqami” qatoriga ijaraga oluvchi talabaning telefon raqami kiritilib, “Tasdiqlash kodini yuborish” tugmasi bosiladi. Talabaning telefoniga SMS orqali kelgan 5 xonali raqam “Tasdiqlash kodi” qatoriga yozilib “Tasdiqlash” tugmasi bosiladi.

Taʼkidlanishicha, “Tasdiqlash” tugmasini bosishdan avval ijaraga oluvchi talaba bilan birga turgan boshqa talabalarni ham “Qoʻshish” tugmasi orqali dasturga kiritish lozim.

Keltirilishicha, ijara shartnomalarini soliq organida hisobga qoʻyilganligi toʻgʻrisidagi guvohnomada talaba va u bilan birga turuvchi talabalar haqida maʼlumotlar ham shakllanadi.

Maʼlum qilinishicha, talabalar bilan tuzilgan ijara shartnomalari hisobga qoʻyilganda ushbu maʼlumotlar Oliy va oʻrta maxsus taʼlim vazirligi bazasida shakllanadi. Bu esa oylik ijara toʻlovining bir qismini qoplab berishda oliy oʻquv yurtlariga qulaylik yaratadi.

• Soliq
• Talabalar