31°
Kechasi 18°
Toshkent metropoliteni tizimi yo‘lovchilar uchun muhim transport turi bo‘lib, shahar bo‘ylab qulay va samarali harakatlanish imkonini beradi.
Biroq, metro yo‘lovchilari duch keladigan muammolardan biri metroda harakatlanish chog‘ida mobil aloqa va yuqori tezlikdagi internet xizmatlarining yetishmasligi bo‘lgan. Chunki metrolarda ham mobil aloqa va internet ishlashi juda muhim bo‘lib, favqulodda vaziyatlarda yoki kutilmagan holatlarda yo‘lovchilar tez yordam xizmatlariga murojaat qilishi yoki yaqinlari bilan muloqotga chiqishi zarur bo‘lib qolishi mumkin.
“Toshkent metropoliteni” DUK matbuot xizmati xodimi To‘ychi Mirzayevning ma’lum qilishicha, bundan bir muddat oldin “Toshkent metropoliteni” DUK hamda “COSCOM” MChJ (savdo belgisi “Ucell”) o‘rtasida o‘zaro hamkorlik memorandumi imzolangan.
Ushbu memorandumdan ko‘zlangan maqsad Toshkent metropolitenining bekatlarida mobil aloqa tizimini yanada takomillashtirish, shuningdek, metropoliten tonnellarida ham bosqichma-bosqich mobil aloqa faoliyatini yo‘lga qo‘yishdan iborat bo‘lgan.
Shu boisdan ushbu ikki tashkilot mas’ul xodimlari tomonidan Toshkent metropoliteni bekat va tonnellarida kerakli texnik ishlar amalga oshirildi hamda sinov tariqasida “Chilonzor” yo‘nalishi metro tonnellarida “Ucell” mobil aloqa operatori faoliyati yo‘lga qo‘yildi.
Shuningdek, alohida ta’kidlash lozimki, kelgusida metro tonnellarida yurtimizda faoliyat olib boruvchi barcha aloqa operatorlari faoliyatini yo‘lga qo‘yish ko‘zda tutilgan. Bu orqali yo‘lovchilar mobil aloqa vositalaridan uzilishlarsiz foydalanishi mumkin bo‘ladi.
Eslatib o‘tish lozimki, prezident Shavkat Mirziyoyevning 2021-yil 16-oktyabrdagi “Toshkent metropoliteni faoliyatining samaradorligini oshirish chora-tadbirlari to‘g‘risida”gi qarorida yer usti halqa metro bekati yo‘nalishida yo‘lovchilar uchun bepul Wi-Fi tizimini yo‘lga qo‘yish va yer osti metro bekatlarida mobil aloqa operatorlari xizmatlaridan foydalanish imkoniyatlarini yaratish borasida bir qancha vazifalar belgilab berilgan.
Xususan, 31 ta yer osti metro bekatida yo‘lovchilar uchun mobil aloqa operatorlari tomonidan ovozli so‘zlashuvlar va keng polosali internet xizmatlardan 100 foiz foydalanish imkoniyatlari yaratilgan, 17 ta yer usti bekatida ham aloqa va internet xizmatlaridan foydalanish imkoniyatlari mavjud.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
