Farg‘ona viloyati Uchko‘prik tumanida chet el valyutasini noqonuniy muomalaga kiritilishining oldi olindi. Bu haqda Bosh prokuratura huzuridagi Iqtisodiy jinoyatlarga qarshi kurashish Departamenti matbuot xizmati xabar berdi.

Qayd etilishicha, Bosh prokuratura huzuridagi Departamentning Uchko‘prik tuman bo‘limi tomonidan tezkor tadbir o‘tkazilgan. Ushbu tadbir davomida tuman markazidagi aviakassa atrofida valyuta qimmatliklari savdosi bilan shug‘ullanib kelgan fuqaro U.R. fuqaro D.ga jami 3 250 AQSh dollarini 35,7 mln so‘mga sotishga kelishgani aniqlangan.

Shundan so‘ng, u kelishilgan puldan 1 750 AQSh dollarini bergan vaqtida huquq tartibod organi xodimlari tomonidan ashyoviy dalillar bilan ushlangan.

Xabarga ko‘ra, mazkur holat yuzasidan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) bilan jinoyat ishi qo‘zg‘atilib, tergov harakatlari o‘tkazilmoqda.

• Farg‘ona
• Jinoyat