Joriy yil 5-yanvar kuni Farg‘ona viloyati Furqat tumanida 3 nafar shaxs tomonidan bosqinchilik jinoyati sodir etildi.

Farg‘ona viloyati IIB bergan ma’lumotga ko‘ra, R.S., S.S va I.B. ismli shaxslar oldindan jinoiy til biriktirib, bir guruh bo‘lgan holda o‘zganing mol-mulkini bosqinchilik yo‘li bilan qo‘lga kiritish maqsadida, niqoblangan holda, pichoq va skotch bilan qurollanib soat 21:30larda Istiqlol MFYda yashovchi X.M (ayol)ning yashash xonadoniga g‘ayriqonuniy ravishda kirgan.

Ular ayol va uning voyaga yetmagan qiziga oshxona pichog‘i bilan hujum qilib, ularni tanasining turli joylariga qo‘llari bilan urib, hayot yoki sog‘lik uchun xavfli bo‘lgan zo‘rlik ishlatib, qo‘l, oyoq va og‘iz sohalarini skotchlab, X.M.ning narxi 3 mln so‘mlik bir juft tilla-taqinchoqlarini talon-toroj qilib, hodisa joyidan qochib yashirinayotgan vaqtida, tuman IIB xodimlari tomonidan daliliy ashyolar bilan qo‘lga olingan.

Mazkur holat yuzasidan Furqat tumani IIB huzuridagi tergov bo‘linmasi tomonidan R.S., S.S va B.I.larga nisbatan Jinoyat kodeksining 164-moddasi 3-qismi “v” bandi (bosqinchilik, 10 yildan 15 yilgacha ozodlikdan mahrum qilish jazosi) bilan jinoyat ishi qo‘zg‘atilib, prosessual tartibda ushlangan.

• Farg‘ona
• Jinoyat