Farg‘ona va Andijon viloyatlarida ishga kirgazib qo‘yish va Xorijga ishga yuborishni va’da qilgan firibgarlar qo‘lga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish Departamentning matbuot xizmati xabar berdi.

Qayd etilishicha, Bosh prokuratura huzuridagi Departamentning Andijon viloyati Jalaquduq tuman bo‘limi tomonidan DXX va IIB xodimlari bilan hamkorlikda tezkor tadbir o‘tkazilgan. Ushbu tadbir davomida aniqlanishicha, tuman Tibbiyot birlashmasi boshlig‘ining sobiq o‘rinbosari X.B. fuqaro Sh.ni tanishlari yordamida ushbu birlashmaga qarashli poliklinikaga hamshira vazifasiga ishga kiritib qo‘yishni va’da qilgan. Shundan so‘ng, undan 1 500 AQSh dollarini olgan vaqtida huquq tartibod xodimlari tomonidan ashyoviy dalillar bilan ushlangan.

Shu kabi, Farg‘ona viloyati Toshloq tumani bo‘limi tomonidan ham tergovga qadar tekshiruv o‘tkazilganda, fuqaro M.I. fuqaro R.ni tanishlari yordamida Janubiy Koreya davlatiga ishga jo‘natish evaziga olgan 5 400 AQSh dollaridan 1 000 AQSh dollarini qaytargan vaqtida ashyoviy dalillar bilan ushlangan.

Xabarga ko‘ra, mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

• Andijon
• Farg‘ona
• Jinoyat