Firibgar kelishilgan summadan bir qismini olayotgan vaqtda ashyoviy dalillar bilan qoʻlga olingan. Bu haqda Iqtisodiy jinoyatlarga qarshi kurash departamenti xabar berdi.

Qayd etilishicha, Bosh prokuratura huzuridagi Departament hamda DXXning Quva tumani boʻlimlari tomonidan tezkor tadbir oʻtkazilgan.

Unda fuqaro A.N. Guliston davlat universitetiga superkontrakt asosida oʻqishga kirgan G.ning kontrakt toʻlovi miqdorini tanishlari yordamida 8,7 mln. soʻmga kamaytirib berish evaziga talabaning onasi X.dan 1 800 AQSh dollari hamda Oʻsh tibbiyot instituti talabasi D.ning oʻqishini Toshkent pediatriya instituti Fargʻona filialiga koʻchirib berishi evaziga 3 000 AQSh dollari talab qilib, shundan 2 000 AQSH dollarini firibgarlik yoʻli bilan olgan vaqtida ashyoviy dalillar bilan ushlangan.

Shuningdek, tergovga qadar tekshiruvda A.N Oʻsh tibbiyot institutining 3 nafar talabalarining oʻqishini Andijon tibbiyot instituti va Toshkent tibbiyot akademiyasiga koʻchirib berishi evaziga jami 10 000 AQSh dollarini hamda Namangan Davlat Universitetiga superkontrakt asosida oʻqishga kirgan O.ning kontrakt toʻlovini oʻziga qarashli firma orqali toʻlab berish evaziga jami 1 400 AQSh dollarini firibgarlik yoʻli bilan qoʻlga kiritganligi aniqlangan.

Maʼlum qilinishicha, hozirda mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qoʻzgʻatilib, tergov harakatlari oʻtkazilmoqda.

• Bosh prokuratura
• Farg‘ona
• Jinoyat