Farg‘ona viloyati Qo‘shtepa tumanida maktab o‘quvchisi 5 yoshli qo‘shnisini otib qo‘ydi. Bu haqda “Bu kun” dasturida ma’lum qilindi.

Qayd etilishicha, mazkur holat Qo‘shtepa tumanidagi “Karnaychi” mahalla fuqarolar yig‘inida sodir bo‘lgan. O‘sha kuni Abdulloh ismli 5 yoshli bola uyi yaqinidagi chorvachilik xo‘jaligida ishlaydigan otasini ovqatlanishga chaqirish uchun borgan. Shu atrofda pnevmatik qurolni o‘ynab yurgan gumonlanuvchi (7 yoki 8-sinf o‘quvchisi) to‘pponchani o‘qlanmagan deb o‘ylab qo‘shni bolani otib qo‘ygan.

“Pnevmatik qurolning o‘qi chap o‘pkadan o‘tib, yurakning chap qorinchasiga kirib qolgan. Yurakni to‘liq to‘xtatgan holda, o‘qni olib tashladik. Hozirda bolaning ahvoli yaxshi”, deydi Abdullohni operatsiya qilgan shifokor.

Viloyat Ichki ishlar boshqarmasining ma’lum qilishicha, ushbu holat Qo‘shtepa tumani IIB tomonidan tegishli tartibda ro‘yxatga olinib, hozirda tergovga qadar tekshiruv ishlari olib borilmoqda.

• Farg‘ona
• IIB
• Jinoyat