11-noyabr kuni kuni Quva tumani IIB xodimlari tomonidan oʻtkazilgan tezkor tadbir davomida, X.D. Rasta MFY hududida joylashgan toʻyxona yertoʻlasida fuqarolarga qonunga xilof ravishda tavakkalchilikka asoslangan lotto oʻynashlari uchun sharoit yaratib, qimorxona tashkil etganligi aniqlangan. Bu haqda Fargʻona viloyati IIB xabar berdi.

Undan 1 dona qora qopda 1 dan 90 gacha boʻlgan raqamli toshlar, 90 dona kartondan yasalgan kartonlar, 1 dona kassa apparati, yogʻochdan yasalgan sandiqcha ichidan 46 000 soʻm pul, 1 dona mikrofon, 1 dona karnay, 1 dona artel televizor, 2 dona kamera xotira kartasi, sovgʻalar 1 dona tefal, 4 dona choynak, 1 dona gaz plita, 1 dona termiz, 3 dona gilam xolislar ishtirokida daliliy ashyo tariqasida olingan.

Maʼlum qilinishicha, mazkur holat yuzasidan Quva tumani IIB huzuridagi tergov boʻlimi tomonidan X.D.ga nisbatan Jinoyat kodeksining 278-moddasi 1-qismi (qimorxona tashkil etish) bilan jinoyat ishi qoʻzgʻatilib, tergov harakatlari olib borilmoqda.

Viloyat IIB axborot xizmatining eslatib oʻtishicha, Jinoyat kodeksining 278-moddasi (qimor va tavakkalchilikka asoslangan boshqa oʻyinlarni tashkil etish hamda oʻtkazish)da koʻrsatilgan jinoyatni sodir etgan shaxs yetti yilgacha ozodlikdan mahrum qilish bilan jazolanadi.

• IIB
• Jinoyat