Farg‘onada zavod gazdan uzilishiga qarshi norozilik bildirganlar qamaldi. Holat yuzasidan viloyat IIB axborot xizmati izoh berdi.

Avvalroq, ijtimoiy tarmoqda Farg‘onaning O‘zbekiston tumanidagi “Sho‘rsuv syement” ishchilari murojaat bilan chiqib, zavodda gaz uzib qo‘yilgani ortidan ishsiz va daromadsiz qolib ketgani aytilgan videolar tarqalgan edi.

Ma’lum bo‘lishicha, joriy yilning 29-noyabr kuni aholiga tabiiy gazni ko‘proq yetkazib berish maqsadida O‘zbekiston tumani, Sho‘rsuv MFYda joylashgan “ALBUS” gips ishlab chiqaruvchi zavodi oldindan tuzilgan shartnoma shartlariga binoan tuman gaz idorasi tomonidan gaz quvuridan uzilgan.

Joriy yilning 6-dekabr kuni zavodning 20 nafar ishchilari yuqoridagi holatni noto‘g‘ri talqin qilib, “o‘zboshimchalik” bilan jamoat tartibiga qarshi nozorilik uyushtirgan.

Mazkur holat yuzasidan O‘zbekiston tuman IIB tomonidan zavodning jami 7 nafar ishchilariga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) hamda 201-moddasi (yig‘ilishlar, mitinglar, ko‘cha yurishlari yoki namoyishlar uyushtirish, o‘tkazish tartibini buzish) bilan hujjatlar rasmiylashtirilib, sud organiga taqdim qilingan.

7-dekabr kuni Jinoyat ishlari bo‘yicha O‘zbekiston tuman sudi kuni huquqbuzarlarning 1 nafariga 10 sutka, 6 nafariga 5 sutkadan ma’muriy qamoq jazosi tayinlagan.

Bir necha kun avval Energetika vaziri Jo‘rabek Mirzamahmudov ushbu holatga izoh bergan edi.

“Farg‘onadagi holatga keladigan bo‘lsak, yana bir bor ta’kidlab o‘tamiz, boshqa alternativ yoqilg‘ida ishlashi mumkin bo‘lgan barcha ob’yektlar havo keskin paytda tarmoqdan uziladi. Bu yerda 10 mingta, deb biroz bo‘rttirib gapirilgan. Bu syement ishlab chiqarish korxonasining 10 ming emas, yuzdan sal oshiqroq ishchilari bo‘lgan.

Hamma biladiki, Vazirlar Mahkamasining tegishli qarori bor, g‘isht zavodlari, yangidan qurilayotgan syement zavodlar barchasi ko‘mir, ya’ni alternativ yoqilg‘ida ishlashi kerak. Hozir bu zavodni tabiiy gazga kim ulagan, kim ruxsat bergan, buni alohida o‘rganib chiqamiz. Lekin korxona rahbarlari shartnoma shartlariga ko‘ra vaqtida ogohlantirilgan. Ishchilar bilan tegishli targ‘ibot ishlarini olib borishi kerak edi”, – dedi Mirzamahmudov.

• Energetika_vazirligi
• Farg‘ona
• Gaz