FIFAning rasmiy xabariga koʻra, tashkilot prezidenti Janni Infantino va Indoneziya futbol assotsiatsiyasi (PSSI) prezidenti Erik Tohir oʻrtasidagi bugungi uchrashuvdan soʻng, FIFA mavjud sharoitlardan kelib chiqqan holda Indoneziyani FIFA U-20 Jahon chempionati 2023 mezbonligidan ozod qilgan.

Keltirilishicha, musobaqaning yangi mezboni tez orada eʼlon qilinadi. Tashkilot JCh-2023 oʻtkazilish muddatini oʻzgartirmoqchi emas. Turnir 20-maydan 11-iyunga qadar oʻtkazilishi belgilangandi.

Shuningdek, tez orada Indoneziya futbol assotsiatsiyasiga nisbatan jazo choralari eʼlon qilinadi.

Avvalroq, turnirga qurʼa tashlash marosimi 31-mart kuni oʻtishi belgilangani, ammo Indoneziya futbol assotsiatsiyasi marosim keyinroq muddatga qoldirilganini eʼlon qilgandi.

Qayd etish mumkin, JCh-2023ga ilk marta Isroil yoshlar jamoasi ham yoʻllanma olgani, ammo bu mamlakat jamoasining Indoneziyaga kelishi mahalliy aholining turli norozilik namoyishlariga sabab boʻlayotgandi.

Gap shundaki, Indoneziya Isroilning Falastin bilan nizolari va bu mamlakatga nisbatan zoʻravonliklari sababli uni tan olmagan. Bungacha Bali oroli gubernatori Isroil yoshlar jamoasini oʻz hududiga kiritmasligini maʼlum qilgan boʻlsa, mamlakat poytaxti Jakartada minglab odamlar Isroil yoshlar jamoasining Indoneziyaga kelishiga qarshi namoyishlar oʻtkazgandi.

FIFA 2016-yil Indoneziyani xalqaro oʻyinlardan chetlatgan edi. Bunga mamlakat hukumatining futbolga aralashuvi sabab boʻlgan. Keyinchalik sanksiya bekor qilingandi.

Avvalroq, Iroq yoshlar jamoasi ham JCh-2023da Isroilga roʻbaroʻ kelsa, bu jamoaga qarshi maydonga tushmasligi yoki umuman turnirda qatnashmasligi mumkinligi haqida xabar qilingandi.

• FIFA
• Futbol
• Jahon chempionati
• U-20