Bosh prokuratura huzuridagi Departamentning Yangiariq tumani bo‘limi tomonidan IIV SHXBB Xorazm viloyati bo‘limi xodimlari bilan hamkorlikda o‘tkazilgan tezkor tadbirda, fuqaro G.D. fuqarolar T.S. va K.S. ni go‘yoki yuqori lavozimda ishlovchi tanishlari yordamida haydovchilik guvohnomasi olish uchun bo‘lib o‘tadigan imtihondan o‘tkazib qo‘yish evaziga 900 AQSH dollari va 1,1 mln so‘mni olgan vaqtida ashyoviy dalillar bilan ushlangan.

Xuddi shunday, Departamentning Tuproqqal’a tuman bo‘limi tomonidan o‘tkazilgan tergovga qadar tekshiruvda, fuqaro D.S. fuqaro S.M.ning ishonchiga kirib, uning o‘g‘li N.M. ni go‘yoki viloyat YHHB idoralarida ishlovchi tanishlari orqali haydovchilik guvohnomasi olish uchun bo‘lib o‘tadigan imtihondan o‘tkazib, haydovchilik guvohnomasi olib berish evaziga 400 AQSH dollarini firibgarlik yo‘li bilan qo‘lga kiritganligi aniqlanib, ushbu pullar hisobidan 300 AQSH dollarini qaytarganligi prosessual tartibda rasmiylashtirilgan.

Departamentning Sariosiyo tuman bo‘limi tomonidan DXX xodimlari bilan hamkorlikda o‘tkazilgan tezkor tadbirda, fuqaro Sh.N. fuqaro O.R. ga o‘zini “Vatanparvar” tashkiloti Sariosiyo o‘quv sport texnika klubi boshlig‘i o‘rinbosari deb tanishtirib, unga o‘quv mashg‘ulotlari va imtihonlarga qatnashmasdan haydovchilik guvohnomasi olib berish evaziga 200 AQSH dollarini olgan vaqtida ashyoviy dalillar bilan ushlangan.

Shu kabi, Departamentning Namangan viloyat boshqarmasi tomonidan o‘tkazilgan tezkor tadbirda, Davlatobod tumanida yashovchi K.X. fuqaro N.V. ni haydovchilik guvohnomasi olish uchun bo‘lib o‘tadigan imtihondan tanishlari orqali o‘tkazib qo‘yishi evaziga 150 AQSH dollarini olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

• Departament
• IIB
• Namangan
• Surxondaryo