Joriy yil 9-noyabr kuni IIVga fuqaro Sh.M. va uning opasi M.N. lar ariza bilan murojaat qilib, arizada Sh.M. ning boshqa shaxs bilan telegram orqali ishqiy munosabatdagi yozishmalarini uning Buxoroda yashovchi qudasi R.D. yashirin yo‘llar bilan qo‘lga kiritib, shantaj qilayotganini bildirgan.

Arizada shuningdek, buxorolik quda ushbu yozishmalarni Sh.M. ning turmush o‘rtog‘iga yuborish bilan qo‘rqitib, yubormaslik evaziga 22 000 AQSh dollari berishini talab qilayotganligi bayon qilingan va holat bo‘yicha qonuniy chora ko‘rish so‘ralgan.

Mazkur arizaga asosan, shu kuni IIV JQBB Korrupsiya va iqtisodiy jinoyatlarga qarshi kurashish boshqarmasi xodimlari tomonidan o‘tkazilgan tezkor tadbir davomida, R.D. va M.F. Toshkent shahar, Yakkasaroy tumani, Muqimiy ko‘chasida joylashgan “Ibroximbek” kafesida ariza muallifi Sh.M. dan talab qilingan 22 000 AQSh dollarini olgan vaqtda ashyoviy dalillar bilan ushlandilar.

Hozirda mazkur holat yuzasidan 2021-yil 11-noyabr kuni Yakkasaroy tumani IIO FMB huzuridagi Tergov bo‘limi tomonidan fuqarolar D.R. va F.M. larga nisbatan JKning 165-moddasi 3-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.

• IIV
• Jinoyat