Ijtimoiy tarmoqlarda Zangiota tumani IIB xodimlari tomonidan fuqaroga tan jarohati yetkazilganligi to‘g‘risida xabarlar tarqaldi.

IIV Matbuot kotibining mazkur holat yuzasidan bergan ma’lumotiga ko‘ra, joriy yil 11-noyabr kuni kechki soat 20:00larda Zangiota tumanida yashovchi fuqaro U.X. (ona) murojaat qilib, o‘g‘li, 1974-yilda tug‘ilgan U.M. muntazam ravishda mast holatida bo‘lishini va  ayni vaqtda uyda janjal qilib, onasi va yaqinlariga tazyiq o‘tkazayotganligini aytib, yordam so‘ragan.

Voqea joyiga yetib borgan Zangiota tumani IIB xodimlari tomonidan tartibbuzar qo‘lga olingan va unga nisbatan MJtKning 183 (Mayda bezorilik), 187 (Jamoat joylarida alkogol mahsulotini iste’mol qilish) hamda 194 (Ichki ishlar organlari xodimining qonuniy talablarini bajarmaslik) -moddalari bilan hujjatlar rasmiylashtirilayotgan vaqtda, tartibbuzar IIBning ma’muriy binosidan qochib ketgan va go‘yoki unga nisbatan kuch ishlatilganligi haqida yolg‘on ma’lumotlarni tarqatgan.

Hozirda fuqaro U.M. ichki ishlar organlariga olib kelingan hamda unga nisbatan, yuqoridagi moddalarga qo‘shimcha ravishda O‘zbekiston Respublikasi MJtKning 40 (Tuhmat) bilan materiallar rasmiylashtirilib sudga taqdim etilgan.

• Jinoyat
• Toshkent