7-fevral kuni Superliga-2023 uchun qurʼa tashlanadi.

Qayd etilishicha, Liga Oʻzbekiston chempionati bilan parallel start oladigan U20 Osiyo kubogi keltirib chiqarishi mumkin boʻlgan noqulayliklarga aniq yechimlar topish ustida ish olib boryapti.

“Rejaga koʻra, Superliganing yangi mavsumi 3-mart kuni start oladi. “Nasaf” Chempionlar ligasida ishtirok etishidan kelib chiqib, Oʻzbekiston Superkubogi oʻyini Superliga starti oldidan emas, balki 14-mart kuni boʻlib oʻtishi rejalashtirilgan edi.

Ammo Oʻzbekiston milliy terma jamoasining mart oyi uchun rejasidan kelib chiqib, Superkubok sanasi yana oʻzgarishi mumkin. Bu haqda keyinroq batafsil maʼlumot beriladi.

7-fevral kuni esa Superliga yangi mavsumiga qurʼa tashlanadi. Jarayon 21:00 dan boshlab “Sport” telekanali orqali jonli efirga olib chiqiladi”, – deyiladi xabarda.

Shuningdek, Liga U20 Osiyo kubogidan kelib chiqib, qurʼa oldidan futbol jamoatchiligi eʼtiborini quyidagi masalaga qaratgan.

Unga koʻra, mart oyidagi FIFA kunlariga qadar “Neftchi”, “Bunyodkor”, AGMK yoki “Olimpik” futbol klublari oʻzaro toʻqnash kelib qolsa, katta ehtimol bilan ular ishtirokidagi oʻyinlar boshqa sanada oʻtkaziladi.

Mazkur jamoalar dastlabki turlar davomida uy uchrashuvlarini boshqa klublarga qarshi oʻtkazishiga toʻgʻri kelsa, mazkur bellashuvlar avtomatik ravishda raqib maydoniga koʻchiriladi.

Keltirilishicha, qolgan barcha holatga qurʼa jarayonida batafsil tushuntirish beriladi.

• Futbol
• O‘zbekiston
• Superliga
• UzPFL