Qashqadaryo viloyati Gʻuzor tumanida 42 yoshli erkak ko‘chadan o‘lik holda topildi. Marhumning yaqinlari uning o‘ldirilganini aytmoqda.

“Daryo”ning yozishicha, voqea joriy yilning 10-oktyabrida sodir bo‘lgan.

Marhumning turmush o‘rtog‘i Dildora Quvvatova erining o‘sha kuni velosipedda ko‘chaga chiqib ketganini va birozdan so‘ng uning velosipeddan yiqilib o‘lgani haqida xabar keltirishganini aytadi.

Hodisa ortidan surishtiruv tergov harakatlarini olib borgan IIB hamda prokuratura ham marhumning velosipeddan yiqilib o‘lganini aytishgan.

Ammo Dildor Quvvatovaga ko‘ra, turmush o‘rtog‘ining qotillik qurboni bo‘lgan bo‘lishi mumkin. Uning aytishicha, sud-tibbiyot ekspertizasi xulosasida eriga o‘tkir tig‘li jism bilan tan jarohati yetkazilagni aytilgan.

Bosh prokuratura mazkur holatga munosabat bildirib, vaziyatga baho berish uchun qo‘shimcha tekshiruv tayinladi.

“Xabarda ko‘rsatilgan holatlarga aniqlik kiritish maqsadida Gʻuzor tumani prokuraturasi tomonidan qo‘shimcha ravishda tergovga qadar tekshirish harakatlari olib borilmoqda.

Qashqadaryo viloyati prokuraturasi tomonidan tekshirish ustidan nazorat o‘rnatilgan. Natijasi haqida xabar qilinadi”, – deyiladi Bosh prokurorning matbuot kotibi bergan xabarda.

• Jinoyat
• Qashqadaryo